Fulham defender thar Cuenca

Premier League club Fulham chuan Spanish defender Jorge Cuenca chu Villarreal aṭangin an la lut a, a man zat tarlan a ni lo thung. Kum 24 mi centre back hi left back-ah pawh chhawr theih niin, Craven Cottage-ah hian kum li chhung atan contract a ziak a, a khelh ṭhat dan a zirin thla 12 dang pawhsei leh theih tur a ni ang.

Spain tan age level-a lo inlan tawh ṭhin Cuenca hian Alcorcon aṭanga a professional zinkawng zawh ṭanin, Villarreal tana a khelh hma hian Barcelona-ah pawh hun a lo hmang ve tawh.

Season hman zawh takah khan Yellow Submarine tan inelna hrang hrangah match 37 khela goal thum khungin, assist vawi khat a nei a, La Liga-ah pariatna nihpuiin, Europa League-ah last 16 an lut bawk.

Cottagers hian Zirtawpni khan Arsenal midfielder Emile Smith Rowe (£27mtd) chu club player man to ber ni turin an la lut tawh a, Ryan Sessegnon chuan Tottenham Hotspur-a a contract a hman zawh hnuin kum hnih chhung atan Fulham ho a pan bawk.

London club hian nipui transfer-ah duhtawk an la tum mai lo a, Manchester United midfielder Scott McTominay nen sawizawm mek an ni - Cottagers hian pound maktaduai 20-in Red Devils hi an dawr tawh a, he thu buatsaih a nih lai hian an inchhan dan chiang taka sawi theih a la awm lo.