Three Lions mei a khup; Denmark an ngam lo!

UEFA Nations League a Belgium an hneh hnu lawkah England-in team tenau zawk nia ngaih Denmark chu 1-0 in an ngam lo a,  Christian Eriksen chuan inkhela goal awmchhun hi a khung. 

Manchester United captain Harry Maguire chu England jersey a hak hnuah pawh mangchhiaiin a kiansan chuang lo a, minute 31-na lekah a yellow card pahnihna a hmuh avangin hnawhchhuah a ni.

Hun tawp hnuah insum theih loh fal avangin Chelsea defender Reece James chuan Spanish referee Jesus Gil Manzano chu a chhuahchhal a, defender zir tur la ngah tak hian ṭul lo takin red card a hmu. 

England laka an tlawm hnuah Belgium erawh an insiamṭha nghal a, khualmualah Iceland chu 2-1 in an hneh - goal khung khawl Romelu Lukaku chuan goal hnih a khung a, goal khat hi penalty aṭanga a chhuih luh a ni. 

Gareth Southgate-a'n 3-4-2-1 forma-tion hmangin a team a remkhawm a, tlarhnunga Conor Coady leh Kyle Walker-te nena inkawp Maguire-a'n Southgate-a 'system' hi a man hlawl lo niin a lang. 

Khawvela defender manto ber hian inkhelh ṭantir lamah ṭul lo takin  Yussuf Poulsen lakah yellow card a chawi a, a hnuah a insiamṭha tawh lo - a position a dik tawk lo fo a, Maguire inkhel en chu hmuhnawm lo tak a ni. 

Minute 31-naah kum 27 mi defender hi a chesual nawn - a 'first touch' tawih lo zet zarah a ball dawn a per hret a, a ball hloh neih let a tumna lamah  Kasper Dolberg chu a tlawh thal. 

Referee tan ngawi renga en liam chi a ni lo a, Maguire hi hnawhchhuah a ni - Ole Gunnar Solskjaer-a'n English club hlun United captain ni tura a rin tawk hi England jersey ha tur pawhin a tlak lo niin a lang. 

England-in Maguire-a chet dan atthlak tak avangin player 10 a an khelh a ngai zui a, minute li hnu lawkah goal an chhuah zui - Walker chu Thomas Delaney lakah a foul niin referee-in a hmu a, Denmark hi penalty a pe. 

Referee Manzano-a thutlukna hi England tan chuan a na hret niin a lang a, mahse a ngaihdan a thlak lo. Inter Milan-ah hmun chang mumal lo mahse Eriksen-a'n a la class reng tih pholangin pressure sangah a buai lo a, penalty hi goal-ah a chantir. 

Tottenham Hotspur a a career tam zawk lo hmang tawhtu Eriksen hian Denmark tan match 100 a khel tling ta chiah a, ram tana match 100 khelh tlin zana goal a khung thei hi a lawm khawp ang - ram tan goal 34 a khung tling tawh. 

England-in match li an khelh tawhah point sarih chiah an nei a, table-ah pathumna an ni mek - group tina hmahruaitu ṭheuhin finals an lut dawn a, Three Lions tan chak loh hi a pawi. 

Harry Maguire-a'n club tana a hun tawn thim tak chu England team-ah pawh a seng lut a, a chet dan âtthlâk tak avangin Denmark hneh loh zanah pawh dem a hlawh hle. 

Mahse, England boss Gareth South-gate chuan a nau hi chhan tlatin, "Hun thim tak a tawng mek a, he hun hi mahni inbihchianna hun ṭha tak a ni. Hetiang hun harsa hi kan tana mi hlute hriatna remchang tak a ni bawk. 

"Player 10 leka khelh ngai chu team tan a ṭha lo em em a, mahse Maguire hi kan thlawp tlat a, a lam kan ṭang tlat a ni," a ti a, a hnual lai taka a player hawisan a duh lo. 

England an tlawm avangin mahni khelmuala a zawna vawi kua an chakna chu a tawp a, Denmark-in 1983 hnua a vawi khat nan Wembley-ah hnehna an chang thung. Hetichung hian Southgate chuan, "Ka naute khelh danah ka lawm a ni," tiin a sawi. 

World number 1 Belgium-in Lukaku an neih chhung chuan manganna tur a awm lo. Inter Milan striker palian hian Iceland lakah goal hnih a khung a, a team chu 2-1 in hnehna a chanpui. 

Lukaku hian minute kuana lekah goal hmahruai a khung a, Iceland tan Birkir Saevarsson  chuan minute 17-naah si phurh a rawn sut. Mahse, Iceland hlim chhung erawh a rei lo. 

Minute 38-naah Lukaku chuan penal-ty hmangin an si phurh a rawn sut a, hun tawp thlenga goal dang lut tawh loin Belgium an chak - kum 27 mi Lukaku hian ram tan match 87 khelin goal 55 ngawt a khung tling ta. 

Iceland hi match li an khelh tawha an la tlawm vek avangin an relegate ngei a rinawm ta a, season thar UEFA Nations League-ah chuan League B lama lungawi an zir a ṭulin a rinawm.