German ral lian dangtu Juve

UEFA champions League last 16 first leg inkhelah Thawhlehni zan khan Italian champion Juventus chuan Turin-ah German club ṭha Borussia Dortmund 2-1 in an hneh. March 18-ah Dortmund khelmual Signal Iduna Park-ah second leg an khel leh ang.

Juventus-in Argentine striker Carlos Tevez hmanga an hmahruaina goal chu Dortmund-in Marco Reus hmangin sut mah se Italian champion hi Spanish forward Alvaro Morata goal hmangin hnehna an chang.

An inkhel e

Dortmund starting eleven-ah Ciro Immo­bile telh a ni a, Italian forward hian inkhelh ṭan aṭanga minute khat pawh a liam hmain goal a khung nghal teuh hle, a shot ṭha tak chu Juve goal pawnah chiah a kal. Dortmund bawk kan hmu leh a, Pierre-Emerick Aubameyang-a'n goal zawnah a pet thei bik lo.

Juve lamin goal thunna hun ṭha an neih hmasak ber an chhawr ṭangkai a, minute 13-naah Carlos Tevez-a'n hnai set sawt aṭangin a khung a, tlar hnung phui tawk loh vang a ni. Minute nga hnuah Reus chuan box pawn aṭangin mawi tak a khung a, Italian defender Giorgio Chiellini tawlh thluk vang a ni. Reus hian Champions League match hnuhnung paliah goal a khung a vek.

Dortmund player Matthias Ginter chu inhliam vangin lakchhuah a ni, a aiah Polish wing back Lukasz Piszczek luh tir a ni. Juve veteran midfielder Andrea Pirlo-a'n inhliam vang thoin Roberto Pereyra a thlak bawk.

Tunlaia midfielder langsar Paul Pogba ball pass chu minute 42-naah Morata-a'n goal-ah a chantir a, goal hmasa zawk ang thoin defence phui tawk loh vang a ni.

Second half-ah team pahnih goal khung theihna hun ṭha an nei ve ve a, goal erawh a luh belh tawh lo. 2-1 in inkhel a tawp.

Goal hmahruai khungtu Tevez-a'n tun season Champions League game sarihah goal li a khung tawh a. Morata-a'n Champions League-a German club a hmachhawn tawhah goal a khung zel, Dortmund lama a khung hma hian Schalke lamah a khung tawh.

Dortmund hian Juventus an hmachhawn tawhah goal an la chhuah vek a, second leg-ah goal an chhuah leh a nih chuan quarterfinal hmachhawn turin hna hautak tak an hmachhawn a ngai dawn a ni.

Enge an sawi?

Juventus manager Massimiliano Allegri chuan, "First half-ah kan khel ṭha lo a, mah se goal hnih kan khung kha kan vannei tak zet. Chawlh lawk hnu lamah kha chuan hma kan sawn a, kan goal kan veng ṭha hle tawh a ni. Goal kan chhuah kha a pawi ka ti a, amaherawhchu result ṭha tak a ni e, football-ah chuan goal chhuah loh reng theih a ni lo," tiin an result-a a lungawi loh thu a sawi.

Borussia Dortmund manager Jurgen Klopp chuan, "Result duhawm tak a ni. First half-ah kan khel ṭha a, goal khungna hun ṭha nei nual mah ila vawi khat bak kan khung thei lo. Juve lam kha chuan an hun ṭha neih vawi hnih kha an chhawr ṭangkai ve ve. Game level sang takah chuan vanneih a pawimawh a ni," tiin an khelh chhiat bik loh thu a sawi.