De Gea contract tihfel vat a ṭul - Schmeichel

David de Gea chu Real Madrid nena sawi zawm a ni a, nipui tranfer a hnai telh telh a, Real keeper Iker Casillas thlak turin thawm a lian tulh tulh. Manchester United keeper ropui Peter Schmeichel chuan Spanish keeper contract chu tifel vat turin a club hlui thurawn pe.

Danish keeper Schmei­chel chuan, "United hian an player ṭha ber hi contract thar an ziah pui vat a ṭul. De Gea hi contract an ziah pui chuan team ṭha ber nih an tum tih a lang ang. United tan Premier League hmahruaitu nih ringawt a tawk lo a, European football-a a ṭha ber nih an tum tur a ni. Spanish keeper hian contract thar a ziah chuan club hmangaihtu zawng zawng an lawm ang, kum nga tal contract a ziah ka beisei," a ti.

De Gea agent Jorge Mendes chuan contract thar chungchangah club nena an inbiak mek thu a sawi a, thu chiang erawh a la awm lo.