Ashley Cole a tel ve lo
Arsenal-in 2003/04 season-a Premier League title an lak ṭum khan Ashley Cole hi player pawimawh a ni a, amaherawhchu documentary 'Invincible: Inside Arsenal’s Unbeaten 2003-04 Season' tihchhuah ṭumin a tel ve lo.
Roma left back Cole chuan a tel loh chhan sawiin, "Ka tel loh chhan chu kan vai atana a ṭhat zawk nan a ni. Fans-in min lawm ka ring lo a ni. Amaherawhchu Arsenal-a ka hun tawn erawh ka hre reng a, mi ropui tak takte nena ka hun tawng kha ka theihngilh tawh lo ang," tiin a sawi.
Cole hi Arsenal youth system chhuak a ni a, kum 1998 aṭangin senior team tan a khel ṭan. A hun tawp lamah erawh contract chungchang vangin club nen an inhmu thiam lo a, kum 2006 nipui khan Arsenal-in contract pawtsei turin kar khata £55,000 hlawh turin an dawr a, Chelsea-in kar khata £90,000 hlawh turin an dawr thung.
English left back hian a hmangaih hmasa Arsenal chhuahsanin an elpui Chelsea a zawm a, a khawsak dan hi tun thlengin Arsenal supporter-te'n an la ngaidam thei lo.
Arsenal Invincibles : Arsenal-in 2003/04 season-ah hneh loh nei loin an champion a, 'Invicibles' tihin hming lem an vuah sak. Arsene Wenger-a team-te hian vawi 26 an chak a, vawi 12 an draw a; khata an khelh dan kha documentary a siam a ni.
Thawhṭanni khan documentary hi a vawi khatna atan tih chhuah a ni a, Arsenal player hluite an inhmukhawm. Nimin khan he documentary hi Sky Sports-ah tih chhuah a ni.