FIFA World Cup Qatar 2022 - Thlasik a neih chungchang boruak a lian

Premier League-in thlasik World Cup a dodal

Football inlena lian ber FIFA World Cup hi nipui a neih ṭhin a, kum 2022 Qatar World Cup bik erawh thlasika neih rawt a ni. World Cup khelh hun chungchangah lungawi lo an tam a, duh lo langsar zingah Premier League club an tel.
Thlasika khelh rawt a nih chhan hi nipui laia Qatar boruak lum lutuk vang a ni. 40 °C hial a kai ṭhin avangin player leh fan-te hriselna a tihbuai hlauh vang a ni ber a, thlasika khelh a nih chuan boruak hi 25 °C vel a nih theih beisei a ni.
Premier League chief executive Richard Scudamore chuan FIFA-in World Cup zirchiang tura a din FIFA committee-in kum 2022 Qatar-a World Cup khelh tur thlasik a neih rawtna chu an thlawp loh thu leh an lungawi loh thu a sawi a, World Cup chuan krismas leh kumthar laia Premier League match a tihbuai a hlauh thu a sawi.
Premier League board thuchhuak chuan , "FIFA taskforce-in Qatar World Cup thlasik laia khelh a rawtna hian min barakhaih takzet a ni," tiin thuchhuah an siam.
Scudamore chuan, "European League tam zawkah a ṭha lo zawngin nghawng a nei dawn tih hre sa reng chungin he rawtna hi siam a ni a, European League-te min ngaihtuah lo hle a ni," tiin a lungawi loh thu a sawi.
Premier League thuneitute thuchhuak chuan, "2022 World Cup a neih ṭhin hun pangngai nipui lai aṭanga thlasik huna sawn a nihna hian kan league zahawmna chu zah lo takin min palzut sak a ni," tiin thlasika World Cup neih an duh lo hle.
Premier League hruaitute chuan club hrang hrang hruaitu leh English football-a stakeholder te an rawn phawt tur thu an sawi a, chumi zawhah chuan an kal zel dan tur an ngaihtuah ang.
FIFA-in thlasika World Cup neih hi a kaltlang pui a nih chuan December thla tawp lamah World Cup hi khelh zawh a ni ang. Hei vang hian English Premier League match December thla chhunga khelh ṭhin zawng zawng chu thlak a ngai ang a, Capital One leh FA Cup bakah Premier League fixtures siam rem a ngaih phah dawn a ni.