Zaninah Europa League last 16 a chiang dawn

Liverpool-in penalty sawi zui hlawh tak hmangin Besiktas an hneh a, zanin hian Turkey-ah Europa league last 32 second leg an khel dawn. Premier League club Tottenham Hotspurs-in Fiorentina khel turin Italy an pan ang a, Everton-in Swiss club Young Boys an mikhual bawk ang.

Harh tharna chang Liverpool

Liverpool-in tunhnaiah harh tharna an chang a, Besiktas an muala an luhkhung tur hi hmuh a châkawm tawg, Inkhel thawh khatna Anfield-a an khelh ṭumin Liverpool-in hun tawp dawna Mario Balotelli penalty hmangin Besiktas an hneh a, goal khat nei sa chungin khualmual an pan dawn.

Besiktas-in khualmualah goal an khung ve loh avangin Liverpool-in goal an khungbelh a nih vaih chuan Turkish club-in last 16 thleng turin goal hnih tala chak an mamawh dawn.

Liverpool hi season ṭan tir lamah khel ṭha lo mah se 2015-ah an khel ṭha a, an game a hmuhnawm thei hle. Khualmuala Southampton 2-0 a hneh zo hlim an nih avangin an phur vanglai tak a ni. Tlar hmaa Phillipe Coutinho, Raheem Sterling leh Daniel Sturridge te ho dan tum hi Besiktas defender te tan a hautak dawn. Captain Steven Gerrard khelh theih dawn leh dawn loh a la chiang lo.

Besiktas hi Turkish Super League-a rin loh taka Eskisehirspor laka 0-1 a tlawm zo hlim an ni a, an zuai lai taka Europe club lian zing ami Liverpool an hmachhawn tur hi a fuh lo a, an innghahna tur chu Chelsea player hlui Djemba Ba a ni.

Besiktas manager Slaven Bilic chuan, "Tunhnai kan game pawimawh tak takah chak result kan hlawh chhuak zo lo. Kan player ṭhenkhat inlan thei dawn lo mah se chak ngei tumin kan bei ang. League game-ah chuan chak loh hnuah insiamṭhat lehna hun a awm ṭhin a, Europe-ah erawh chuan a theih ve lo," tiin chak loh a tum lo.

Besiktas tan hian goalkeeper Tolga Zengin, defender Ismail Koybasi leh forward Cenk Tosun-te chu inhliam vangin an khel thei dawn lo.

Italy-ah Spurs

White Hart lane-ah first leg khelh a ni a, Tottenham Hotspurs-in Roberto Soldado hmangin goal khung hmasa mah se Jose Basanta hmangin Fiorentina-in an sut a, 1-1 in inkhel a tawp.

Zaninah Stadio Artemio Franchi-ah second leg an khel leh dawn a, chak tur zawk sawithiam harsa tak a ni. Spurs hian Pathianniah Capital One Cup final an khelh dawn avangin an manager Mauricio Pochettino tan chuan player a har viau ang.

Players ṭha an lut dawn a nih chuan tun season-a goal 24 khung tawhtu Harry Kane a hnawksakin a rinawm a, midfielder Christian Eriksen ven uluk a ngai bawk ang.

Spurs hian an match hnuhnung berah West Ham 2-2 in an draw a, Fiorentina-in an khingpui Torino 1-1 an draw ve bawk. First leg-a an inhnehtawk tlat avangin dinhmun ṭha zawk an awm lo, zaninah a chiang ang.

Everton an chiang

Everton-in an khelmual Goodison Park-ah Swiss club BSC Young Boys an mikhual dawn. Everton hian Young Boys hi khualmualah Romelu Lukaku hattrick hmangin 4-1 in an a, last 16 thleng turin an dinhmun a ṭha hle.

Inter vs Celtic

Celtic Park-ah Scottish club Celtic leh Inter Milan-in Europa League last 32 first leg an lo khel tawh a. Team pahnihin goal an sur tir a, 3-3 in an ṭin. Away goal rule hman a nih dawn avangin an indraw chuan Inter hi dinhmun ṭha zawk tura ngaih an ni.

Celtic-in kartawp khan Scottish Premier League-ah Hamilton Academical 4-0 in an sawp a, Italy-a goal khung leh turin tlar hma player-te'n inrintawkna an nei ang.

Inter Milan hi tunhnai Serie A match thum an khelhah hnehna an chang vek a. San Siro-a an phur vanglai taka Inter hneh tum hi thil harsa tak a nih a rinawm.