Orlando City captain Kaka

Brazilian playmaker Kaka chu Major League Soccer club Orlando City captain thar atan ruat a ni.

Kum 2007-a World Player of the Year lo ni tawh Kaka hian March 8 khian a club tana a game hmasa ber a khel dawn a, a captain-na hnuaiah New York City an hmachhawn ang.

Nipui transfer khan Italian club AC Milan aṭangin Orlando hi a zawm a, mah se MLS chawlh lai a nih avangin an ram club Sao Paulo-ah loan in a kal a, tunah chuan a club Orlando tan a khel tawh ang.

Orlando coach leh Everton striker hlui Adrian Heath chuan, "Kaka hi a rawn kal tirh aṭangin club-ah a nungchang ṭha tak ṭhin kha a rawn chhawm lut a, training-naah leh awm khawmnaah hruaitu a ni nghal der tawh a ni. Player naupang zawk leh lo awmsa ten an entawn nghal a, kan tan chuan a tawn hriat leh theihna te hi a ṭangkai hle ang. Tunah chuan kan hruaitu ber a ni tawh ang," tiin an captain thar chungchang a sawi.

Kum 32-a upa Kaka hian Brazil tan game 89-khel tawhin goal 29-a khung tawh.