West Indies hmachhawn tur South Africa
Pathianni zing dar 9:00 hian 2015 ICC World Cup-ah South Africa leh West Indies an inkhel dawn a, squad en chuan South Africa hi chak zawk tura beisei ni mah se West Indies hi Zimbabwe sawp zo hlim an ni a, dah hniam chi an ni lo.
Sydney Cricket Ground-a inkhel tur team pahnih hi team inang lo tak an ni. South Africa hi Cricket World Cup apiangin champion tura rinkai zinga mi ni ziah chungin vawikhatmah an la champion lo.
South Africa hian an match hmasa berah Zimbabwe run 62 in an hneh a, bul an ṭan ṭha. Amaherawhchu, an match hnihnaah India lakah an mualpho a, run 130 in an tlawm. World Cup-a an la chak loh chian ber ṭum a ni.
West Indies hi an match hmasa berah mak takin Ireland an hneh lo. West Indies hian vaw hmasain run 304 an siam hnuin Ireland an in umphak tir a, wicket liin an chak lo. Chutihrualin West Indies hi an match hnihnaah an insiamṭha nghal a, run 150-in Pakistan an sawp. An match thumnaah pawh West Indies an danglam lo a, wicket hnih chauh hlohin run 73-in Zimbabwe an hneh.
South Africa tan an captain AB de Villiers-a pawimawh lehin a rinawm. India an hneh loh nasat chhanah khan Villers khelh ṭhat loh hi puh theih a ni. A out hnuin batsman dang an ding hleithei tawh lo a ni ber a, West Indies an tum hunah pawh a chet ṭhat leh ṭhat lohah South Africa an innghat thui khawp ang.
West Indies tan Chris Gayle bawk a pawimawh leh dawn. West Indies opener hian Zimbabwe an tum ṭumin Cricket World Cup-a tuma la tih theih loh a ti a, double century a siam. Gayle mai bakah hian West Indies-in Marlon Samuels an nei a, anni hi Zimbabwe an hneh ṭuma out loa run 133 siamtu a ni.