Man City ngam loh Suarez

2014 World Cup-ah England-in Uruguayan forward Luiz Suarez an ngam lo a, Liverpool forward hlui hi Thawhlehni zan khan England-ah a kir a, English club Manchester City-in an ngam lo.

Thawhlehni zan Champions League last 16 first leg inkhelah Barcelona-in Suarez goal hnih hmangin English champion Manchester City chu an khelmual Etihad Stadium-ah 2-1 in an hneh. City beiseina siam turin Argentine forward Sergio Aguero-a'n goal khat a khung a, English keeper Joe Hart-a'n Barca thiampuipa Lionel Messi penalty pet a dang bawk.

An inkhel ta

Team ṭha leh player ṭha awm khawmna inkhelah team ṭha zawk an awm a, Barcelona-in inkhelh ṭan tirh aṭangin mualneitu Manchester City an chaih nghal. Minute 16-na lekah Suarez-a'n City keeper Joe Hart dan hman loh turin a ke vei lam in a hlap goal nghal.

Barca-in inkhel an thunun chun zawm a, minute 30-naah City player-te'n Messi an um a, Argentine captain hian Jordi Alba a pass hnuah Alba hian Suarez thun turin a siamsak zui nghal. Goal khung tura Suarez-a'n City defender kar aṭanga a rawn put chhuah dan a turu hle. City lamin goal kung duh mah se ball an chang meuh loh avangin Barca tlanghnung an su nghing zo lo. Defender Dani Alves chuan first half tawp dawnah goal a bar a tih per a, first half-a 2-0 chauh a nih hi City an vannei hle.

Second half-ah City lamin goal khung tumin an nawr a, an game a nung thar. Minute 69-naah Sergio Aguero chuan goal mawi tak a khung. English club an phur chho dawn chauh tihin minute 74-naah defender Gael Clichy chuan a vawi hnihna atan yellow card a hmu a, hnawhchhuah a ni.

Hun tawp dawnah City defender Pablo Zabaleta-a'n a hnampui Messi a tih tluk avangin penalty a chawi a, mah se Messi-a penalty pet chu Hart-a'n a lo dan sak a, a per let pawh chu awlsam taka khung theih tur a ni nachungin Argentina captain hian a khung thei chuang lo.

Inkhel behbawm

Barcelona hian Champions League-a an game hnuhnung panga-ah an khingpuite an hneh fai vek. An tluk loh awm chhun chu Real Madrid an ni a, Real hi match kaw chhung an chak tawh. Barca hian Champions League match 200-an khelh aṭangin goal 200-an khung tling chiah bawk.

Barcelona striker Suarez hian Hart-a goal vena goal hnih a vawi hnih khungna a ni a, a hmasa zawk chu 2014 World Cup-a Uruguay leh England inkhelh ṭum khan a ni. Suarez hian Barca tan goal kua a thun tawh a, a ṭhiante goal kung tur vawi 12 a siam sak tawh bawk. A club tan match 23 a khelh tawhah goal 21 an khung theih nan tha a thawh tawh a ni.

City hian Champions League-ah record ṭha an la hnutchhiah lo, vawi khat mah last 16 an la paltlang lo.

City striker Aguero hian tun hnai Champions League game hnuhnung 10-a khelhah goal 11 a khung thei a, a career-ah UCL-ah hian goal 20 khung tawhin Barca boss Luis Enrique aiin Champions League-ah goal khatin a khung tam zawk.

Enge an sawi?

Barca boss Luis Enrique chuan, "Kan inkhelh zawng zawngah chak tumin kan bei ṭhin, chu chu zaninah pawh khan kan game-ah a hriat theih. Ka nauten an khel ṭha a, kan dinhmun hi ala him bik lo a kan khelmualah chuan theihtawp kan chhuah leh ang. Messi kha tihsual nei thei ve tho a ni a, penalty a pet goal loh vang khan amah kan rinna a tlak hniam phah lo," tiin a sawi.

City boss Manuel Pellegrini chuan, "Inkhel a la zo lo, hmabak kan la nei a beisei kan nei tur a ni. Goal kan chhuah hma khan kan khel chhe hran lo a, mahse goal kan chhuah hnu khan kan talbuai deuh a ni. Kan player hnawh chhuah a ni a, bei let turin a harsa tawh a ni. Mahse ka naute beih let danah ka lawm hle, inkhel result ṭha tak chu a ni lo a, mahse a chhe hran lo e. Hart-a'n penalty a dang hlauh kha kan vannei a ni," tiin beisei a neih zel thu a sawi.