AFC Cup-ah Mizo telna Bengaluru an chak

Bengaluru FC chuan Asia-a competitive match an khelh hmasak berah hnehna an chang nghal a, Thawhlehni zan khan khan Maldives club Maziya Sports & Recreation Club chu 2-1 in an hneh.

Sree Kanteerava Sta­dium, Bangalore-a inkhelah hian Bengaluru FC tan India captain Sunil Chhetri leh Shankar Sampingiraj te'n goal an khung. Nikuma I League champion Bengaluru first eleven-ah Mizo pathum goalkeeper Lal­thuammawia Ralte, left back Lalchhuanmawia leh winger Beikhokhei te an in lan.

Inkhelh ṭan aṭanga minute 11-na lekah Maziya star Pablo Aracil chuan a mikhual team tan tauh lut nghal a, offside vangin goal-ah pawm a ni lo. Hemi hnu lawk hian Mizo tlangval Chhuantea chuan Shankar Sam­pingiraj-a ta'n ṭha takin ball a cross phei a, Shan­kar-a hian lo tauhin Maziya goalkeeper Ali Amdhan chuan ṭha takin an nam chhuak.

First half-ah Benga­luru bet zawk mah se, counter attcak-ah an hlauhawm thei hle. Mizo tlangval Beikhokhei, Khasi tlangval Eugeneson Lyngdoh leh India striker pasang Robin Singh te'n chance ṭha an hlah vek a, goal awm loin chawlh­lawk an hmang.

Second half an ṭan a, Bengaluru lam a hlauhawm zawkah an ṭang. Bengaluru striker pahnih Robin Singh leh Sunil Chhetri te'n Maziya goal an rum ṭhaih zauh zauh hnuin minute 67-naah Chhetri chuan Benga­luru tan a thun ta nge nge.

Goal dang awm tawh loin an tawp mai dawn emaw tih laiin, minute 87 naah Maziya lamin Bengaluru defender John Johnson handball vangin penalty an chawi a, Mohamed Umair a penalty pet chu Mizo tlangval Thuammawia'n lo khawih per mahse goal-ah a lut ta tho a, 1-1 a ni.

Hun a tlem tawh avangin match hi 1-1 a ṭin mai tura ngaih a ni. Injury time-ah Bengaluru-in free kick an hmu a, Khasi midfielder Lyngdoh-a pet chu minute 93-naah Shankar-a'n a pet goal. Goal luh hnuah hun a tawp zui a, AFC Cup an khelh hmasak berah Bengaluru-in chak result an hlawhchhuak.

March 10-ah Benga­luru hian Indonesia club Persipura Jayapura chu khualmualah an hmachhawn ang. AFC Cup inkhel dangah East Bengal an chak zo lo a, Mizo tlangval S. Malsawmtluanga (Mama) leh Lalrindika te khelhna hian Malaysian club Johor Darul Ta'zim F.C 1-4 in an hneh lo.