Match hnih khel lo tur Matic

Chelsea-in an midfielder Nemanja Matic red card hmuh dana an lungawi loh thu Premier League thuneitute hnenah an thlen a, hnuk kir tura an ngen hnuin match thum hrem tur kha match hniha pawh tawi a ni.

Kartawpa Chelsea leh Burnley te inkhelh ṭumin Burnley player Ashley Barnes-a'n Chelsea midfielder Matic hi a kalh thlu a, Matic thin thawk chuan Barnes hi nam let a, hnawhchhuah zui a ni. Referee Martin Atkinson chuan Matic hi red card a pe a, dan pangngaiah chuan match thum hrem tur a ni.

Chelsea chuan, "Ashley Barnes kha a chet mawi loh em avangin match hnih chhung hrem ngei zawk tur awm tak a ni. Matic khan thiam lohna a nei lo chung pawh a hremna a tuar hi a pawi takzet," tiin thuchhuah an siam.

English striker ropui ni ṭhin Alan Shearer chuan, "Ashley Barnes a chet dan kha a mawi lo tak zet a, a demawm hle. Matic-a'n a nam let pawh kha ka thil ṭha chu a ni hran lo nain ka dem hran lo. A chhan chu Barnes khan Matic ke a tlawh na lo kha a mak zawk a ni. Yellow card a hmu lo kha a vannei hle," tiin Barnes a dem thu a lo sawi ve bawk.

Matic hian Pathianni zan League Cup final-a Tottenham Hotspurs leh Nilaini zana Premier League-a West Ham United an khelh hunah a tel thei lo a, March 8-a Southampton hmachhawn hunah erawh a tel thei thung ang.