Hawla Indoor Stadium pan zan : Khatla Vs Mission Veng
TBL kan rawn chhuak e,
hnehna nomawi chang turin
Zam ngai lo val an rawn pen e
Hneh turin, hneh turin,
kan zam ngai dawn lo
Khelmual hi kan ta a ni
Lenrualte u, lo thlirteh u
Kan hneh ang, kan hneh dawn
Mizoram Super League awm hmaa Mizoram basketball champion Khatla TBL an zam lo, inelna ṭan hma hauhin 'khelmual hi kan ta a ni' tiin an au chhuak. Khatla hian MSL Playoff-a hneh loh nei loa champion Tuikual South hnehin bul an ṭan a, zanin dar 8:00 hian an veng ṭhenawm Mission Veng Vikings an hmachhawn dawn. Boruak nuam leh hlimawm tem duh tan Hawla Indoor Stadium pan a fuh ang, kal remchang hman lo tan Zonet Zawlbuk-ah a thlir theih.
Khatla TBL hmaa ding tur Mission Veng Vikings hi MSL-a chak hmasa ber an ni a, an game hmasa berah Zarkawt Serpents 78-64 in an sawp a, veng ṭhenawm leh match hmasa bera chak pahnih inkhel tur hi basketball ngainatute en châk a ni.
A entlak dawn
Khatla-in Mizo basketball player zinga thleng sang ber H. Laldinsanga an kawl a, coach leh player ni kawp Mapuia hian an game hmasa berah point 18 zet a nei a, buaipui tham a ni.
TBL ṭhat leh bawkna chu hun rei tak an khelh ho tawhna hi a ni. Khatla tlangval Vanlalnunsanga (Lana) captain a nih angin team kaihruaitu ṭha tak a ni a, forward pahnih Lalrinpuia Hlondo leh Nelson Lalrohlua te hi point hmuh kawngah player pawimawh an ni a, defence lamah team ti chaktu an ni bawk.
Mission Veng-in inelna ṭan hmain practice-naa inhliam vangin K. Lal-
ṭhazuala an chan a, Tuikhuahtlang tlangval power forward hi MSL-ah inlan ve thei dawn lo. Zuala tel loin an game hmasa berah Zarkawt Serpents an hneh a, tawnhriat nei ṭha Lalrina Renthlei leh Lalrempuia Vaiphei te an khel ṭha hle.
Sawi hmaih theih loh chu Model Veng tlangval Moses Zoremmawia a ni. Vikings small forward Moses hian point 15 a nei a, game-ah a ṭangkai em em bawk. TBL hmachhawn hunah game kaihruaitu Dawrpui Vengthar tlangval Lalnunpuia a pawimawh bawk ang. Vikings point guard Nuna hian game hmasa berah point 10 a nei a, assists vawi li a nei bawk.
A ring zel dawn
Mipui au thawm a la ring tawk lo a, a ring zel ang. Khatla TBL-in supporter an nei ṭha a, match hmasa lama tlaia an inkhelh avangin entu an ngah tawk lo. Zan lama an khelh dawn avangin a hma aiin an tam tawh ang.
TBL-ah Republic Veng tlangval pathum Nelson, Andrew Lalmalsawma leh R. Darliansanga te an kawl a, inelna hmun hi Republic Vengthlang a nih avangin player pathum hian ṭawiawmna an neih ṭhat beisei a ni. Anni bakah hian College Veng star Papuia'n an nei a, Hawla Indoor Stadium-ah College Veng ṭhalai an awm nual ang.
Mission Veng Vikings-in an game hmasa berah ṭantu an ngah a, mipui an tam ngaihtuahin an au rual tawk lo. Inkhel tawp lamah awmze neiin thawm an nei tawh a, an game hnihnaah a ṭha lehzual tura ngaih a ni.
Mission Veng hi Mizoram-a veng hlun ber zing ami a ni a, anni ang bawka huhang nei ṭha Chanmari Veng aṭangin ṭawiawmna an hmu ṭha ang. Vikings-ah hian Chanmari tlangval Rempuia, Lalfakzuala Renthlei, P. Lianchama leh coach Reuben Lalchhandama te an kawl a, Chanmari hi Mizoram Premier League-ah pawh ṭantu ngah an ni. Tin, Vikings-in Lalrina leh Lallawmzuala Renthlei an kawl avangin Tuikhuahtlang lam aṭangin an pui ṭha bawk dawn. A tawi zawngin zaninah inkhel entu an tam dawn.
Eng nge an sawi?
Mission Veng Vikings coach Ch.D-a chuan, "Mimal angin tumah ven uluk bik kan nei dawn lo, team angin kan khel dawn. Team zawng zawng hi theihtawp chhuahin kan khel vek dawn, TBL hi an danglam bik lo. Kan chak ngei ka ring," tiin a sawi.
Khatla TBL neitu R. Malsawmtluanga chuan, "Mission Veng hi huphurhna kan nei lo a, Pathian zarah kan chak turah ka ngai. Veng pawn leh chhung aṭangin ṭawiawmna kan hmu ṭha a, min ṭawiawm chhunzawm zel turin ka ngen bawk a ni," tiin a sawi.