HIL a hmuhnawm dawn Bhawanipore vs Mohammedan

Hero I League qualifier chu vawiin tlai dar 4:30-ah khelh chhunzawm a ni dawn a, match hnih an khelh tawh aṭanga hnehna la chang ve ve Mohammedan SC leh Bhawanipore an inkhelh dawn avangin inkhelh en châkawm a tling. 

Mohammedan hian an match hmasa berah Garhwal chu 1-0 in an hneh hram a, match hnihnaah erawh Ara FC chu 4-1 ngawtin an sawp thung - mahse an match hnihnaah hian result aia ngaihven hlawh zawk a awm a, chu chu coach Yan Law an ban thu a ni. 

Mohammedan-in kum 27 mi Yan Law an ban chhan hi match-fixing lama a inhnamhnawih vang nia sawi a ni a, Kolkata club-in thuchhuah an siamah erawh an coach an ban chhan chu mahni thu duh leh midang ngaithla lo a, a duhdan anga a kal luih vang niin an tarlang. 

Thuthar berah erawh Mohammedan hian Maidan Police Station-ah FIR an thehlut a, Yan Law chu a club hlui Minerva Punjab leh a neitu Ranjit Bajaj laka team chhungkaw chanchin thlen ṭhinah an puh. 

Yan Law erawhin he thu buatsaih thleng hian Mohammedan nena an inkar boruak a sawi duh lo a, Ranjit Bajaj chuan Mohammedan SC hotute chu dik lo taka a hming an tihchhiat avangin thubuai siamsakah a vau thung.

Mohammedan hi hetiang boruak kara inlan tur an nih avangin team boruak a ṭha lo ang tih a chiang a, player nei ṭha zawk ni mah se Bhawanipore coach hi tawnhriat nei ṭha Sankarlal Chakraborty a nih bawk avangin Bhawanipore hi an chak zawk a nih pawhin a mak lo ang. 

Bhawanipore hian Bengaluru United 2-0 a an hneh hnuah Garhwal chu 2-1 in an hneh leh bawk a, point ruk an nei - vawiin tlaia MSC an hneh theih chuan I League tling chiang anga ziah ngam an ni hial ang.