McGregor-a'n Poirier a hmachhawn dawn

June thlaa UFC a chawlh-san thu puangtu Conor McGregor-a'n a dan pangaiin a chawlh a sut leh dawn niin a lang a, nakkuma Dustin Poirier hmachhawn turin a lo kir tur thu a sawi. 

Kum 32 mi fighter hian June khan MMA a chawlhsan thu a puang a, kum li chhunga a chawlh a puan vawi thumna a ni. Mahse, UFC president Dana White nen indawrna an nei a, a lo kir leh dawn ta niin a lang. 

McGregor chuan, "Janua-ry 23 a fight hmachhawn turin ka lo kir dawn a,  Cowboy stadium ngeia fight hmachhawn ka duh a ni," tiin twitter lamah a ziak. 

Irish fighter-in fight hmachhawn a duhna hmun hi American football team Dallas Cowboys ho khelmual AT&T Stadium a ni a, he club neitu  Jerry Jones nen an inṭhianṭhat avangin Texas khawpuia stadium-ah hian fight hmachhawn a duh niin a lang. 

Kum 31 mi Poirier chuan McGregor-a chona hi chhanglet nghalin, "Ka in nen a inhnaih dawn a, ka piancham kar a ni dawn bawk. Eng weight-ah nge kan inhmachhawn ang?" a ti a, McGregor a hlau lo hle. 

McGregor hian thla hma-sa khan boxing ring a luh leh tur thu a lo sawi tawh bawk a, boxer ropui Manny Pacquiao nen Middle-East lamah an inhnek tur thu a sawi.

Irish fighter-in fight a hmachhawn hnuhnung ber chu January khan a ni a, UFC 246-ah Donald Cerrone chu second 40 chhung lekin a hneh a ni.