Leverkusen-in Spainish Champion an hneh

Germany-ah Atletico Madrid an zin a, chak loin Spain-ah an kir.

Nilaini zan khan Bayer Lever­kusen-in an khelmual Bay Arena-ah an mikhual La Liga champion Atletico Madrid chu Hakan Calhanoglu goal khat thun hmangin 1-0 in an hneh a. Second half-ah Atletico midfielder Tiago chu hnawhchhuah a ni.

March 17 khian Vicente Calderon-ah Champions League last 16 second leg khelh a ni ang.

Inkhel chu

Manager pahnih an fimkhur tih a chiang a, team pahnihin goal khung tumin an innawr pup pup lo. Midfield-ah ball an in chuh nasa a, team pahnih goal bawh a na lo ve ve.

First half-ah thling langsar a awm lo a, Atletico midfielder Tiago leh Leverkusen Grik defender Kyriakos Papadopoulos te'n yellow card an hmu a, Atletico player pahnih Jesus Gamez leh Raul Garcia te inhliam vanga lakchhuah an ni.

Second half-ah inkhel a danglam nghal mai lo, minute 50-naah Raul Garcia'n 35 yards aṭangin kawh takin Leverkusen goal-ah a pet a, goal ding lam sirah chiah a kal. Hemi hnu hian Turkish midfielder Calhanoglu-a'n goal khungna hun ṭha a nei a, mah se Atletico defender-te'n an tibuai hman.

Minute 56-naah goal a lut ta, Karim Bellarabi ball siamsak chu Calhanoglu chuan a ke dinglam hmangin ṭha tak maiin Atletico goal-ah a khung. Turkish midfielder hian tun season Champions League-a a goal hnih khungna chiah a ni.

Atletico-in an si phurh sut ngei an tum a, Arda Turan aiah Fernando Torres luh tir a ni. Spanish forward hian corner aṭangin goal-ah a tauh lut a, amaherawhchu Torres ball tauh hma hian a out hman avangin pawm a ni lo.

Minute 75-naah Tiago-a'n yellow card ṭum hnihna a hmu a, hnawhchhuah a ni. Inkhel tawp thlengin goal dang a luh belh lo. Leverkusen 1-0 in an chak.

Enge an sawi?

Atletico boss Diego Simeone chuan, "Khualmuala inkhel kan nih avangin inkhelh a harsa deuh. Tharum an ngah avangin kan che thei lo a ni ber. Kan result hi lungngaihna tur em em a ni hran lo, a chhan chu kan khelmualah kan la inkhel ve leh dawn a hneh let ngei kan tum dawn a ni," tiin a sawi.

Bayer Leverkusen coach Roger Schmidt chuan, "Chak ngei tumin kan khel a, kan tum leh duh ang ngeiin chak result kan nei thei hi a lawmawm hle. Chance chu kan ngah lo khawp mai mah se kan duh ber goal kan neih avangin kan lawm. Inkhel a la zo lo a, khualmual a khel tur kan nih tawh avangin kan theih tawp a kan beih chhun zawm a ngai dawn a ni," tiin quarterfinal an la luh chian loh thu a sawi.