Zaninah Chaltlang Vs Tuikual South

Mizoram Super League Playoff champion Tuikual South coach KC Lalliantluanga'n Playoff an champion theihna chhan chu mipui vang a ni a, MSL-a chak hmel hmu turin mipui bawk an pawimawh tur thu a sawi. Chaltlang Ryders assistant coach Marc Lalthlamuana Sailo-in mipui ṭang­kaina a hmuh hmaih lo, bus hmanga Hawla Indoor Stadium an pan tur thu a sawi ve bawk.

Zanin dar 8:00 hian Chaltlang Ryders leh Tuikual South te an inhmachhawn dawn a, club pahnih hian MSL-ah chak an la nei lo.

Chaltlang Ryders-in an game hmasa berah Zarkawt BCA an hneh lo a, insiamṭhatna tur an ngah hle. Tuikual South an danglam lo, MSL-a an game hmasa berah Playoff-a an game an pha lo a, Rakesh leh Ravi Kant te awm loh a lang. Zanin hian state pawn player pahnih hi Tuikual South-in an chhawr dawn chuang lo a, team pahnih hi inkhingtawk tura ngaih an ni.

Chaltlang-in Zarkawt BCA an hneh loh ṭum­in player pawimawh Samuel Malsawmkima a lay up-na lamah a ke a bilh a, zaninah a inlan theih theih beisei a ni.

Chaltlang assistant coach Marc chuan, "Richard Hleh Hminga te Tuikual South hma­chhawn hunah an inlan thei tawh ang. Mapuia leh Richard-te hi practice-naah an inkawp rem viau a, result thlak danglam thei tur an nih ka beisei," a ti.

Match hmasa zawka big man David Lalrin­chhana harsatna vanga a tel theih dawn loh avangin Kulikawn tlangval Richard Hmingliana awm tur hi Ryders tan a pawi­mawh takzet a. Richard ang bawka match hmasa zawk inlan lo Bawngkawn tlangval LP Lalhmingliana hi squad ti chak tur player a ni ang.

Chaltlang assistant coach chuan sawi chhun­zawmin, "BCA khan outside shooting an ngah a, tunah chuan pressure kan pe ṭha tawh ang. Ch.P-a, Mafaka leh Dina te kan veng uluk dawn," a ti.

Tuikual South captain F. Zodinthara'n game hmasa berah beisei a pha lo a, point kua chauh a score. Forward C. Lalfakawma erawh a che ṭha point 20 zet a nei a, Armed Veng tlangval Vanchuangpuia (Ch.P-a) tlar hnung leh tlar hmaah a pawimawh viau bawk.

Tuikual South coach/player KC-a chuan, "Tui­kual South hi ka telna ni lo se, inchawi dawn ilang chuan Tuikual South-ah ka dah ang, mah se 100%-a inrintawk chu ka ni lo," tiin an ṭhat zawk thu a sawi.

Chaltlang tana point 29 score tu Lamuanpuia Zote (Mapuia) chung­chang sawiin KC-a chuan, "TBL Mapuia ai chuan Ryders Mapuia chu ven a nuam deuh ang. Mimalin tumah kan veng dawn lo, team naupang tak ni mah ila defensive game nei ṭha ber zing ami kan ni," tiin an khelh dan tura an chian thu a sawi.