Hmasawn duh Constantine

India football team coach thar Stephen Constantine chuan football-in hmasawnna tak tak hmu tur chuan thu chauh ni lo a, a taka hnathawh a ngaih thu a sawi.

English coach Con­stantine chuan, "Hun kal tawha kan tih ṭhat tawk loh kan sawi ri­ngawtin hmasawnna a a awm thei lo. Tunah chuan grassroots kan ngaih pawimawh a ngai, naupang-a hmasawnna kan neih loh chuan result ṭha kan nei thei lo ang," tiin a sawi.

Constantine chuan, "Football ram ropui thlir ta ila, U17 World Cup-a che ṭha lo senior team-a che ṭha an awm ngai lo. China-ah chuan school zawng zawngah football zir turin thupek an siam hial," tiin grassroots pawimawhna a sawi.

English tactician chuan sawi chhun­zawmin, "Kan player-te hian season khatah match 60-70 an khel a, an khel tam lutuk deuh a ni. Hahchawlh an mamawh a, tun aia mumal hian football season plan kan mamawh," tiin a sawi.

India national team coach chuan Indian Super League (ISL), Federation Cup leh I-League avanga match tam lutuk chu India foootball team-in a chhiatpui thu a sawi a. English coach hian scouting system chu tun aia mumal zawka an kalpui tur thu a sawi tel bawk.