MCL Thlirlawkna Armed Veng Cricket Club & Chaltlang Sporting Club
Mizorama Cricket inelna ngaihhlut Mapuia Cricket League (MCL) 2015, vawi thumna chu March 3 khian Suaka Cricket Ground, Sihhmuiah khelh a ni dawn. He inelnaah hian Mizorama cricket club ṭha ber berte zinga mi parukte an inel dawn.
Cricket Association of Mizoram (CAM) leh LPS Vision-te ṭangkawpin an buatsaih tournament-ah hian champion lai chu Kulikawn Cricket Club an ni a, kuminah erawh he tournament khel tura an tlin zawh loh avangin an hmel kan hmu dawn lo.
February 17 zan khan player auction neih zawh a ni tawh a, Chhinga Veng Cricket Club player Jonathan Lalbiakkima chu player manto ber niin Chaltlang Sporting Club chuan he tournament bika chhawr tur hian Rs. 26500-in an lei. He tournament hi league-a khelh kual phawt a ni ang a, a sang pahnihte'n qualifier 1 an khel ang a, a chak zawk zawk final an lut ang. Pathumna leh palinate'n eliminator an khel ang a, heta chak zawk hi qualifier 2 inhlangkaiin qualifier 1-a chak lo zawk nen final luh inchuhin an inhmachhawn dawn a ni.
He tournament khel tur hian host team chan chang Zarkawt Lords chu automatic qualification pek an ni a, anni bakah hian season hmasaa team auction hmangin Ramhlun Venglai an tling bawk. A bak team palite chu kumin 1st division inelna Mahuma Memorial Tournament league-a pakhatna aṭanga palina - Chanmarians Cricket Club, Chaltlang Sporting Club, Armed Veng Cricket Club leh Zemabawk Pitchers Cricket Club-te an ni.
Armed Veng Cricket Club
Mizorama cricket club hlun berte zinga mi an ni. He team hi an chhiat ber lai ni theia ngaih ṭum pawha rin phak baka an khingpuite chai thei an nih bakah game pressure sanga ṭang thei tak an ni.
Tun season hi an ṭhat ber ṭuma chhal theih a ni miah lo a, hetichung hian league lamah an theihna an lantira a ṭha zual pali zingah an la inhlangkai thei.
MCL player auction-ah Rs. 10900 an seng a, player pali an lalut. An player lak luhte hi champion pui theih khawpa theihna nei sangah an ngai a, an player kawl sa nen result duhawm tak neih theih an inbeisei. Armed Veng hian Mizoram cricket inelnaa lawmman sang awm thei zawng zawng deuhthaw chu an hui zo vek tawh a, an la champion ngai lohna MCL-ah hian champion an tum hle. He team hi khelmual chhunga an che reng rengah an fitness a ṭha tih a hmuh theih a, hei hi an chakna hnar ber pakhat a ni ang.
Auction-a an player leite
Lalbiakvela (Luangmual CC) Rs. 5000; C Vanlalhmuaka (Crying Wolves CC) Rs. 2900; B Lalchhuanawma (Gladiators CC) Rs. 3000; K Denver (Tlangnuam CC) Rs. 2000
Chaltlang
Sporting Club
Chaltlang SC hi tun hnaia Mizoram cricket inelnaa rawn invawrh chho thar an ni a, an tawnhriat neih tlem ngaihtuaha team khauh ṭha zet mai an ni thung. Tun season-a inelna an telna zawng zawngah a sang chin an la thleng vek thei a mahse an champion-na tur kawngah MCL-a an elpui tur Chanmarians CC an la ding ziah.
He team hian an veng ṭhenawm Chanmarians tluk lo chiah chiaha tham ral reng hi an tum lo ang. Hei hi player auction lamah pawh a lang chiang a, an team thawm ṭhat ngaihna laite an hrechiang em em a, an team-a pawp lai thawm ṭhat nan sum pawh an seng hreh loa Rs. 43500 sengin player lei nana sum hmang hnem ber an ni a, champion tura rin kai berte zinga mi an ni bawk. Team anga thawh hona ṭha an neih leh an fitness hmachhuanin MCL-ah an rawn ding chhuak dawn a ni.
Auction-a an player leite
Jonathan Lalbiakkima (Chhinga Veng Cricket Club) Rs. 26500; C Lalrinsanga (Chhinga Veng Cricket Club) Rs. 11000; Arbind Sahi (Kolasib DCA) Rs. 6000.