MFA Honorary Secretary hlui RD Sangkhuma kan chân ta

Mizoram Football Association Honorary Secretary hlui RD Sangkhuma (75), Zuangtui chu October 15, 2020 tlai dar 4:10 khan kal nâ avangin a boral a, October 16 zing dar 9:00-ah vui a ni ang.

RD Sangkhuma hi kum 1996-2002 chhung MFA Honorary Secretary a ni a, hei bakah hian kum 1999 khan hun rei lo te chhung chu MFA Vice president hna a chelh bawk a, club football lamah pawh a inhmang ṭhin bawk a ni.  A hun laiin MFA-in kawng tam takah hma thar lain ke a pen a, mi taima leh inphal tak a ni a, football hmasawnna tura tha leh zung bakah sum leh pai pawh ṭhahnem tak lo seng tawh ṭhin a ni.

RD Sangkhuma hi eizawnna lama mi hlawhtling tak a nih bakah kum 1972-a Mizoram Union Territory (U.T.) hnuaia MLA inthlan hmasa berah Ratu Constituency aṭangin kum 27 mi niin Mizo Union ticket-a MLA-a thlan a ni a,  tun thleng hian Mizo zinga MLA thlan tlin naupang ber a la ni.

Mizoram football tana thawhhlawk tak mai kan chân ta hi MFA chuan pawi a ti takzet a, a kalsan tak a chhungte Pathianin awmpuiin thlamuan rawh se.

- Issued by Information & Publicity Committee, Mizoram Football Association