FIFA-in zângnadawmna pek a tum lo

FIFA World Cup 2022 Qatar-a neih tur boruakin daih lam a pan hleithei lo.

European Club Association-in Europe club-te tana zângnadawmna an phut hnu lawkah FIFA hruaitute chuan zângna­dawmna an pek loh tur thu an puang.

ECA-in Europe club-te tana zângna­dawmna pek a phut chhan hi FIFA taskforce-in Qatar World Cup 2022 thlasik a neih a rawt vang a ni a, World Cup hi thlasika neih a nih chuan thlasik laia league game khel ṭhin Europe club-te'n sum leh pai tam tak an hloh dawn nia an ngaih vang a ni.

FIFA secretary general Jerome Valcke chuan chhangin, "Eng club mah zângna­dawmna kan pe lo ang. Qatar World Cup khelh nan kum sarih lai a la awm a, an duh tak tak a nih chuan chumi chhung chuan an insiamrem hman vek a ni," a ti.

Qatar khawpui Doha-a press conference naah Valcke chuan, "Club ho hnena thupha chawi pawh ṭul ka ti chuang lo. World Cup aṭanga hlawkna an neih ve theih dan turah inremna kan nei sa vek tawh. Kum 2010 World Cup-ah pound maktaduai 26 kan pe a, kum 2014 ah pound maktaduai 45 kan pe bawk a. Kan inremna ang bak pawisa pek hi a ṭulna ka hre lo. Football kan tichhe vek dawn pawh a ni lo a, thlasikah vawikhat World Cup kan khel dawn a ni mai," a ti.

Valcke chuan thlasik a World Cup neih rawtna chu FIFA chuan a pawm theihna 'chance' a tam zawk thu a sawi bawk. 2022 World Cup hi thlasikah an khel a nih chuan a khelh hun chhung hi tihtawi rin a ni.

World Cup hi ni 31 emaw ni 32 chhung khelh a ni ṭhin a, ni 28 velah tihtawi tum a ni a, final bik hi December 18 emaw Decmber 23-ah emaw khelh a ni ang.

Qatar World Cup thlasika neih hian dodaltu a neih belh zel a, English Premier League, KNVB (Dutch Football Association), Scottish Football Association leh ECA te'n an duh loh thu an lo puang tawh a ni.