Sri Lanka-in Upul Tharanga an ko

Sri Lanka chuan an all-rounder Jeevan Mendis inhliam vangin kum 30-a upa an opening batsman ṭhin Upul Tharanga chu World Cup squad-ah an ko.

Kum 32-a upa all-rounder Jeevan Mendis chu Thawhlehni khan training-naah a inhliam a, World Cup chhung zawnga khelh theih a rinawm loh avangin a aiah Tharanga hi koh a ni ta a ni. International Cricket Council chuan Sri Lanka-in Tharanga an kohna hi an pawmpui tawh bawk.

Tharanga hian Sri Lanka tan ODI vawi 176 khel tawhin run 5,339 a vawchhuak tawh a, hengah hian vawi 13 century siamin vawi 28 half-century a siam tawh bawk.

Tharanga hi kum 2011 ICC World Cup-a Sri Lanka-in final an luhna kalkawnga player pawimawh ber pawl a ni a, century vawi hnih a siam a ni.