Arsenal sawptu AS Monaco hi...

French football club lian zingah chhiar tel an ni ṭhin a, an player hluite chu Thierry Henry, Emmanuel Petit leh Lilian Thuram tih te an ni a, an te lo.

French Ligue 1-ah vawi sarih cham­pion tawhin kum 2004 phei kha chuan Champions League final hial an lut. Mahse, kum 2010-2011 season-ah khan Monaco an che chhia a, Ligue 1-ah 18 na an ni a, Ligue 2-ah an tla thla. Ligue 2-ah pawh Monaco an talbuai tho a, December-ah chuan Ligue 2 mawngphahah an awm.

Chhanchhuaktu mihausa

Monaco tan Russian billionaire a lo lang a, Dmitry Rybolovlev chuan share 66.67% leiin AS Monaco khaichhuah a tum. 2012-13 season atan Chelsea coach te pawh lo ni tawh Italian Claudio Ranieri an la lut a, Ligue 2-ah champion-in Ligue 1-ah an inhlangkai nghal.

Kum 2013 nipui bazar-ah Monaco-in players lakluh nan pound maktaduai 140 an seng a, Europe club zinga seng hnem pawl an ni.

FC Porto aṭangin tuna Real Madrid player ni ta James Rodriguez leh Joao Moutinho bakah club record a Atletico Madrid aṭanga an lei pound maktaduai 50 man Radamel Falcao te an ni. Ligue-1 a an kai thar kumah hian Paris Saint Germain tluk loin pahnihna an ni.

Mi hausa tamna Monaco khua

Monaco innghahna khua leh a hming put chhan France rama khaw pakhat Monaco hi mi hausa tamna khua a ni. An khaw mipui hmun thuma ṭhena hmun khat hi millionaire an ni a, khawvela khaw dang zawng zawng aiin he khuaah hian billionaire an tam ber bawk. An khaw mipui zat hi 37,831 chauh an ni.

He khuaah hian mi hausa in nuam tawl tura a mamawh ang zawng zawng chu a awm vek tih tur hial khawpa mi hausa ho tamna a ni.

Star player an chhuak

Russian billionaire-in a lei hnuin Monaco-in sum tam tak sengin players ṭha lalut mah se, 2014-15 season an thlen dawn meuh chuan AS Monaco-in an player ṭha leh hlawh tam Radamel Falcao chu Manchester United-ah loan-in an kal tir a, Colombian winger James Rodriguez chu pound maktaduai 59-in Real Madrid hnenah an hralh bawk.

Monaco-in player ṭha lakluh belh mang lo chunga an players ṭha te an chhuah tir chhan hi Monaco neitupa Rybolovlev leh a nupui Elena Rybolovlev te inṭhen vang a ni a. Russian pa hausa hian a nupui hnenah tluklehdingawn tel pawisa pek a ngaih vang a ni.

Arsenal tlawmtu Monaco

An star player ṭhin te kawl tawh lo chungin AS Monaco in rei tak chhung an khelh tawh lo Champions League tun season-ah an khel a, last-16 an la lut zui. Monaco mipui an hlim a, last-16 a an tum tur erawh English club ṭha Arsenal an nih avangin Monaco khawpui a hlauthawng.

Monaco khaw chanchinbu lar ber Monaco Hebdo in headline-ah lian takin "peuvent-ils le faire?" (An ti thei dawn em?) tih a hmang a, he zawhna hi AS Monaco-in Arsenal an hneh theih dawn leh dawn loh zawhna a ni.

Khualmualah AS Monaco an zin chhuak a, rinkai loh zawk nichungin 3-1 in Emirates stadium-ah Arsenal an hneh a, Monaca khua hlimin an lam. French club lian kan hmuh ṭhin AS Monaco kha an lo kir leh ta em ni? Hunin a la hril ang.