Vawiin tlaiah Zarkawt Derby

Mizoram Premier League-ah Chanmari Derby a awm a, Samsung 3:16 Plan Solution Mizoram Super League-ah Zarkawt Derby a awm thung. Vawiin tlai dar 4:00 hian Serpents leh BCA te'n Hawla Indoor Stadium-ah MSL-a Zarkawt Derby hmasa ber an khel ang.

Zarkawt Ser­pents-in an game hmasa berah Mission Veng Vikings an hneh lo a, captain Hmingthanmawia chuan MSL match hmasa ber boruak an zawh loh vang a nih thu a sawi. An khingpui tur BCA assistant coach Lalruatfela chuan Serpents chak loh chhan chu over training vang nia a hriat thu a sawi thung.

Zarkawt BCA-in an game hmasa berah Chaltlang Ryders an hneh a, harsatna an nei lo. Assistant coach Afela pawhin an khel ṭha tih a zep lo a, hmasawn zel an tum thu a sawi tel bawk.

BCA game hmasa berah Zorinsanga a khel ṭha a, Ramthar tlangval shooting guard position-a khel hian point 18 lai a nei a. Zorina hi point guard Michal F. Lalawmpuia (13 Points) leh forward Henry Lalramngaihawma te'n an thlawp ṭha a; veteran player Jackson Lalrintluanga leh Dennis Lalmuanpuia te an ṭang­kai bawk.

Serpents-in Vikings hneh lo mah se Champhai phir unau captain Hminga (18 pts) leh Lalremruata (12 pts) te an hmuhnawm a, BCA tan pawh Champhai duo te hi an hnawksak ang.

BCA assistant coach Afela chuan, "Zarkawt-ah cheng lo mah ila Derby hi chu a dang ve khawp mai. Zarkawt player ṭha Lalsawma leh Henry te hi kan club-ah an khel a, chuvangin ṭantu kan neih ṭhat ka ring. Chak ngei tumin kan khel ang," tiin Dawrpui tlangval chuan a sawi.

Serpents captain Hminga chuan, "Kan game hmasa ber khelh hma khan indoor-ah kan practice thei lo a, chuvangin kan theihna angin kan khel thei lo. Tunah chuan practice-na hun kan nei tawh a, kan game pawh a danglam ngei ka beisei," tiin a sawi.

Champhai tlang­val chuan sawi chhun­zawmin, "BCA hneh loh hi kan duh lo a, theihtawp chhuahin kan bei dawn. An verteran player-te kan veng uluk dawn," tiin chak ngei an tum thu a sawi.

Starting Line-Up
Zarkawt BCA (Vs Ryders) : Remsanga (PG), Zorina (SG), Dave (SF), Jack(PF), Dede-a (Center).
Zarkawt Serpents (Vs Vikings) : Hminga (PG), KC Hruaia (SG), Rinnunga (SF), Sangkima (PF), Rinzuala (Center).
Note : PG - Point Guard; SG - Shooting Guard; SF - Small Forward; PF - Power Forward.