Emirates Stadium-ah Arsenal an zawr

Football-ah chak zawka rinkai an chak reng lo. Arsenal-in an khelmual Emirates Stadium-ah Monaco an hneh lo a, goal thum ngawt an chhuah.

Nilaini zan Champions League last 16 first leg-ah Arsenal-in an mikhual AS Monaco 1-3 in an hneh lo. Second leg hi March 17 khian Stade Louis II-ah khelh leh tur a ni.

Emirates Stadium-ah Monaco tan Geoffrey Kondogbia, Dimi­tar Berbatov leh Yan­nick Ferreira Carras­co te'n goal khat ṭheuh an khung a, Arsenal tan Alex Oxlade-Chamber­lain-a'n hun tawp dawnah goal khat a khung ve bawk.

Goal khat phawt

Arsenal-in goal bawh a na nghal a, Danny Welbeck goal shot ṭha tak chu goal veilam sirah a kal. Arsenal-in ball an chang tam a, goal chance erawh an insiam thei bik lo.

Monaco midfielder Joao Moutinho chuan goal thun tumin penalty box pawn aṭangina a pet a mah se Arsenal goal veilam sirah a kal hlauh.

Gunner striker che ṭha Olivier Giroud leh player taima Alexis Sanchez te'n goal khungna hun ṭha an hmuh an chhawr ṭangkai zo lo ve ve.

Darkar chanve an khel tlin hnu lawkah Monaco tan Portuguese midfielder Moutinho chuan goal a khung teuh hle a, mahse hemi hnu hian a ṭhianpa goal khung tur a siamsak. Minute 38-naah Geoffrey Kondogbia-a'n Moutinho hneh aṭanga a ball dawn chu penalty box pawn aṭangin Arsenal goal-ah mawi takin a thlawh lut. First half-ah goal khat a lut.

Goal thum dang

Second half-ah Arsenal bawkin bul an ṭan zawk a, Sanchez-a ball siamsak chu goal ngei tur a ngaih ni tawh mah se Giroud-a'n goal-ah a chantir thei lo.

Minute 53-naah Manchester United striker hlui Berbatov chuan Arsenal goalkeeper David Ospina dan hman lohin a pet goal leh a, mikhual team-in 2-0 in hma an hruai.

Arsenal-in an si phurh sut tumin thapui an thawh ṭan a, Arsenal boss-in Giroud leh Francis Coquelin lachhuakin Theo Walcott leh Chamberlain te a luh tir. Amaherawhchu khelmualah Portugal midfielder Moutinho a langsar chhunzawm zel. Mourinho leh Anthony Martial te'n Arsenal tlar hnung an chhaih buai zui zel.

Minute 90-na a rik rual chiahin Cham­berlain chuan Arsenal tan goal khat a khung a, Arsenal fan te au thawm pawh a reh hmain Monaco-in Ferreira Carrasco hmangin goal thumna an khung a, 3-1 in khel a tawp.

Arsenal-in quarterfinal lut turin France-ah goal thum tal an khung a ngai a, an dinhmun a chhe hle.

Inkhel behbawm

Champions League/Europa League-ah hian mahni khelmual a goal hnih emaw a aia tam zawk phurh hnua chak leh thei hi an awm khat hle. Hetiang ti thei hnuhnung ber chu Ajax an ni a, kum 1969 khan Fenerbache an lehthal a ni.

Arsenal tana goal khungtu Chamberlain khan a club tan match 112 a khel tawh a, goal 12 a khung tawh a, Champions league bikah goal thum a khungna chiah a ni.

Monaco goal thumna khungtu Yannick Ferreira khan tun hmain Champions League-ah goal a la khung ngai lo a, Arsenal lama a thun kha a goal khat thunna a ni.

Arsenal hian khelmual thar Emirates Stadium an luah hnuah Champions League-ah France club pathum Montpellier, Lille leh Marseille-te an lo mikhual tawh a, an mikhual te hi an hneh vek bakah goal khat mah an chuah lo. An home-a French club an hneh loh hnuhnun ber chu 2002-03 season kha niin Auxerre chu group stage-ah an hneh lo.

Eng nge an sawi?

Arsenal boss Arsene Wenger chuan, "Kan tan chuan ni ṭha lo tak a ni. Kan khingpuite kha an khel ṭha tak zet a, keini lam khan beisei kan pha lo hle. Kan zir leh tum dan angin kan khel chhuak zo lo a, min dang bet tlat a kan che thei lo a ni. Sanchez leh Giroud te kha an vanduai a, goal thun theihna hun an neih an chhawr ṭangkai thei lo kha a pawi hle. Hun tawp ruala goal kan chhuah leh kha a pawi khawp mai, kha khan kan inkhelh leh tura ti hautak dawn hle," tiin a sawi.

Monaco boss Leonardo Jardim chuan, "Champions League a kan chakna lian ber a ni kher lo ang, a hmain Zenit leh Bayer Leverkusen pawh kan lo hneh tawh a ni. Arsenal kha first half-ah an khel ṭha hle a, kan goal ven kha kan hna ber pakhat a ni. Amaherawhchu goal khungna hun ṭha kan in siamsak thei tho a ni. Kan khingpuite kha player ṭha tak tak an ni a, mahse football chu team a khelh chi a nih avangin kan chhe bik lo tih kan lan tir thei. Chak zawk sawi ala hun loa football-ah chuan result mak tak tak a la thleng thei reng a ni," tiin a ṭawng fimkhur hle.