Inkhelh leh ka tum - Ronaldo

Brazil striker ropui Ronaldo chuan kum li zet inkhelh a chawlhsan hnuah field-ah a kir leh a beisei thu a sawi. Brazilian striker hian US Club Fort Lauderdale Strikers tan a inlan leh a tum.

Kum 2014 December-ah khan Ronaldo hian he club-ah hian share a lei a, club enkawlna lamah thuneihna tam tak a chelh mek bawk.

Kum 38-a upa Ronaldo hian kum 2011 khan football-a lo chawlhsan tawh. A vanglaiin Europe club lian PSV Eindhoven, Barcelona, Inter Milan, Real Madrid, AC Milan bakah Brazil club Corinthians-ah te a lo khel tawh ṭhin a ni.

Ronaldo chuan, "Tunah hian inkhelh leh tumin ka training ve mek, beisei ang chuan field chhung a luh leh a goal thun leh ngei hi ka chak a ni. Mahse tunah chuan ruahmanna chauh ala ni a, hlawh­tling tur chuan theihtawp ka chhuah phawt a la ngai a ni," tiin a sawi.

FIFA World Player of the Year pawh lo ni tawh Ronaldo hian Brazil tan match 98 a khel tawh a, goal 62 a khungin ram tana goal khung hnem ber dawttu a ni a. Brazil-in 2002 World Cup an champion-na kawngah player pawimawh a ni a, 1998 World Cup-ah Golden Ball a dawng bawk.