Greece sorkar-in football khelh a khap

Greece sorkar chuan an ramah football inelna neih ṭhin League sang pathumte chu tiam chin awm loin a ti tawp.

Pathiannia Super League inkhelah Olympiakos leh Pana­thinaikos an inhmachhawn a, hetah hian buaina nasa tak a chhuah avang leh Thawhlehnia club thuneitute board meeting-a an inhnial buai nasat em vang a ni. Olympiakos leh Panathinaikos inkhelh ṭum hian fan-te'n field-ah lung, bottle leh halpuah chi hrang hrang an vawm lut a ni.

Nikum September leh Novem­ber-ah pawh khan inkhelh lai a buaina chhuak avangin Super League hi chawlh lailawk a lo ni tawh bawk.

September thlaa hremna awm chhan hi third division team Ethnikos Piraeus leh Irodotos inkhelh ṭuma fan-te intihbuainaah fan pakhat a thih avang a ni a, a hnuhnung zawk hi chu assistant director of the refereeing commi­ttee-in beih a tawh vang a ni.

Super League president Gior­gos Borovilos chuan, "Tunah chuan sorkar thar kan nei tawh a, kan sorkar thar hian a rang thei ang berin kan inkhelh leh theihna tur a ngaihtuah ngei kan beisei. Buaina chhuak thunun dan tur leh hmalak dan tura ngaihtuah mek a ni. Sorkar hian club te chet vel dan a thlithlai mek a, club ten venhimna uluk zawka kan kalpui thei a nih chuan kan inkhelh leh theih thuai a rinawm," tiin a sawi.