A chung berah Delhi Capitals
Indian Premier League-ah Delhi Capitals-in pakhatna dinhmun luah turin Nilaini zan khan Rajasthan Royals run 13 in an hneh. Dubai International Stadium-ah Delhi hian bat hmasain run 161/7 an siam a, Rajasthan Royals-in run 148/8 chauhin an chhanglet.
Ṭhumvawrah Delhi Capitals an vannei a, captain Shreyas Iyer-a'n bat hmasak a thlang. Royals bowler Jofra Archer-a'n opener Prithvi Shaw vawm hlum turin ball khat lek a mamawh a, English bowler hian run 19 chauh pein wicket li a la.
Amaherawhchu Shikhar Dhawan (57) leh captain Shreyas Iyer (53) ten half century an siam ve ve zarah Delhi Capitals hian run 161/7 an siam pha a, target chhuanawm tak ni lo mah se chakpui theih tur erawh a ni tho.
Rajasthan Royals tan Ben Stokes (41) leh Jos Buttler (22) ten bul an ṭan chhe lo a, amaherawhchu Delhi bowler-te an che ṭha tlang. Ravinchandran Aswhin-a'n wicket khat chauh la mah se run 17 chauh a pe a, Anrich Nortje (33/2) leh Tushar Deshpande (37/2) ten wicket hnih ve ve an la.
Royals tan Sanju Samson (25) leh Robin Uthappa (27) che ṭha pangngai mah se a tawp lamah an talbuai a, over 20-ah run 148/8 chauh an siam thei a, run 13 chauhin an chak lo.
Delhi Capitals hi vawi riat khelhah vawi hnih chiah an chak lo a, vawi ruk an chak tawh. Shreyas Iyer hote hian Hyderabad leh Mumbai chiah hneh loh an nei a, Rajasthan Royals erawh vawi hnih an hneh tawh a ni.
Zanin dar 7:30 hian Mumbai Indian leh Kolkata Knight Riders te an inkhel ang. Mumbai hi an chak a nih chuan Delhi nen point 12 ve ve an hmu thei dawn a, Kolkata hi an chak a nih erawh chuan team pahnih hian point 10 ve ve an hmu thung ang.
IPL - Thlirna Tawi
• Indian Premier League hi 2008 aṭanga khelh ṭan a ni.
• IPL hi vawi 12 neih a ni tawh a, team paruk an champion tawh. Chungte chu Mumbai Indians (2013, 2015, 2017, 2019), Chennai Super Kings (2010, 2011, 2018), Kolkata Knight Riders (2012, 2014), Rajasthan Royals (2008), Deccan Chargers (2009) leh Sunrisers Hyderabad (2016) te an ni.
• Kumin hi IPL vawi 13-na a ni a, team pariat Mumbai Indians, Delhi Capitals, Kolkata Knight Riders, Royal Challengers Bangalore, Chennai Super Kings, Sunrisers Hyderabad, Rajasthan Royals leh Kings XI Punjab te an inel.
• Vawi hnih ṭheuh an inkhel chhuak ang a, chuta a sang pali chuan Preliminary Round an thleng ang.
• Preliminary Round hi chi thum Qualifier 1, Eliminator leh Qualifier 2-ah ṭhen a ni. Qualifier 1-ah league a pakhatna leh pahnihna an inkhel a, heta chak zawk hian final an lut nghal. Chutihrualin a chak lo zawk tan pawh final luh theih dan la awmin Qualifier 2 an khel leh ang.
• Eliminator-ah pathumna leh palina an inkhel ang a, a chak lo zawk an tla a, a chak zawkin Qualifier 2 an khel ang.
• Qualifier 2-ah hian Qualifier 1-a chak lo leh Eliminator a chak an inkhel a, heta chak hian final an lut dawn. Qualifier 1-a chak nen champion an zawng ang.
Kumin league round hi November 3-ah khelh zawh a ni ang a, November 10-ah final khelh a ni ang. Hemi inkarah hian Preliminary Round hi khelh a ni ang.