Badminton thiam ber Viktor Axelsen

Viktor Axelsen chuan badminton khel tura mi bik a nihna chu a takin a lantir leh ta. Denmark tlangval hian Thailand tlangval Kunlavut Vitidsarn chu 21-11, 21-11 a hnehin Paris Olympic 2024 gold medal a vaw chhuak.

Thawhṭanni zan final inkhelah Axelsen hian minute 52 chhungin Vitidsarn hi 21-11, 21-11 in a hneh a, inelna lian an neih hmasak Tokyo Games-ah a lo hlawhtlin tawh bawk avangin, a zawnin Olympic champion a ni.

Olympic boruak hi chu a danglam ṭhin, inkhel entute chu “Viktor! Viktor” tiin an aurual dual dual a, hnehna a chan hnuah Axelsen hi an ram Denmark hnam puanzar kengin a tlan kual a, amah ṭantute chibai a buk.

Mipui lamin zahna chibai an buk ve thung - European player zingah a zawna Olympic badminton champion hmasa ber a ni a, tun ṭumah hian Europe tlangval zinga mipa badminton khel phak awmchhun a ni tel bawk - a la champion zui!

Chak lo zawk Vitidsarn tan pawh lawmna tur a awm tho - Thailand mipa zingah Olympic badminton huanga medal vaw chhuak thei hmasa ber a ni a, a mellung phun hi chhinchhiah reng a ni tawh ang.

Mi bik Axelsen

Europe chauh a ni lo, khawvel huap pawhin Axelsen hian sulhnu ṭha bik a hnutchhiah. Chinese legend Lin Dan-a hnuah Olympic men's singles title la zawn thei hmasa a ni; Lin Dan kha 2008 leh 2012 khan a champion.

Kum 30 mi Axelsen chuan, "Hnehna ka chan khan engtiang takin nge ka lawm tih pawh ka hre leh tawh lo, a nihna takah chuan nuam ti leh ṭha taka khelh tum tawp mai kha ni mah ila ka awm dan kha ka hrethiam lo.

"Denmark tana hlawhtlinna chan hi ka duhthusam a ni ṭhin a, tunah chutiang hun lawmawm bik chu ka thleng leh ta chiah, kei leh kan ram mipui tan badminton gold medal hi a hlu," tiin a sawi.

6ft 4in zeta sang Axelsen hi inkhel boruak sangah a chiai ve ngai lo. Final tir lamah khel ṭha lo zawk ni ma se zawi muangin a khingpui a pawtthla a, game hnihnaah chuan dan theih ang khawpin a kal leh tawh thung.

Los Angeles Olympic 2028 chungchang zawhna chhangin Axelsen chuan, "Hma hun sawi lawk theih a ni lo, chutihrualin inelna hmachhawn turin phurna ka la nei a, medal la tlakin ka la khel thei a nih chuan inlan loh chhan tur a awm lo ang," a ti.

Pathumna Lee Zii Jia

Mipa badminton huangah hian India chuan medal beiseina a nei sang hman hle, mahse semifinal-ah Lakshya Sen chu Axelsen hneh loin a tla a, bronze medal inchuhna inkhelah a chak lo zui leh bawk.

Sen-a hian tun hmain Lee Zii Jia lakah hian record a nei ṭha zawk a, inrintawkna pawh a nei sang. Amaherawhchu, Malaysia tlangval lakah 21-13, 16-21, 11-21 a chak loin medal beiseina a thamral.

Game hmasa berah fal taka kalin a chungnung a, mahse semifinal ang bawkin boruak sang a zo lo. Hun pawimawh laiah tihsual a ngahin point hlohtu zawk a ni zel, game hnuhnung pahnihah a hnufual viau a ni.

Olympic badminton huangah India hian Olympic hnuhnung pathumah medal a la vek - Saina Nehwal leh PV Sindhu te hmeichhe inelna huangah medal an lo la tawh, tun ṭumah erawh India a hlawhtling zo ta lo.

Tun ṭumah hian London Olympic bronze medalist Saina a inlan phak lo a, a hnuhnung pahniha medal latu Sindhu chu inlan mah se a tum ram a thleng zo lo, India tana medal beiseina chu a thlawn ta a ni.

Hmeichhe champion An-i

Paris Olympic hmeichhe inelna lamah South Korean nula An Se-young chuan Chinese mi He Bingjiao chu 21-13, 21-16 a hnehin a champion ve thung a, an tan hun chhinchhiah tlak bik a ni.

Kum 22 mi An-i chuan, "Ka vanglai tak a la thleng loin ka hria, ka kum ngaihtuahin tun aia hun ṭha lehzual zawk pawh ka neih theih ngei ka beisei," tiin Paris chauh ni loin Los Angeles Games a thlir tel nghal.

Tun dinhmunah An Se Young hi world number 1 a ni a, kum 28 chhung teh meuh South Korea ramin a lo nghah tawh chu ti hlawhtlingin, tunah chuan Olympic badminton singles huangah gold medal an hlawh chhuak ve ta.

Korean nula zingah chuan Bang Soo-hyun kha Olympic badmionton singles medal la thei awmchhun a ni rei hle, kum 1992 Barcelona Games-ah khan silver medal a la, ani hnuah An-i a rawn lang ve leh ta chiah a ni.