Alvarez chungchangah Man City leh Atletico an inrem

Manchester City manager Pep Guardiola-a'n Julian Alvarez chunga rinna a nghah thu a sawi aṭanga darkar 48 pawh ral hmain Argentine forward hmalam hun a chiang. Alvarez chungchangah City leh Atletico an inrem a, Argentine forward-in Etihad Stadium a chhuahsan dawn.

English club chuan thuchhuah siamin Atletico-in Alvarez an dilna €75m leh a chet ṭhat dan a zira a man zat €20m-a a pun theihna chu an pawm thu an puang. City hian Julian hi medical nei tur leh mimal contract chungchanga indawrna nei turin Spain pan an phalsak bawk.

Alvarez hi Argentina tan Olympic a khelh avangin US-a City tour-naah a tel lo a, club pahnihin inremna an neih takah English club hi a chhuahsan ngei dawn tih a chiang bawk.

Argentine forward Alvarez hian kum 2022 khan Argentine club River Plate aṭangin City hi £14.1m-in a zawm a, hetihlai hian hriat a la hlawh lo. Mahse, season hnih chhungin City hi Premier League nomawi pahnih bakah FA Cup, Champions League, Super Cup leh Club World Cup-ah te a champion pui.

Man City tan Alvarez hi a pawimawh a, match 103 khelin goal 36 a khung. Chutihrualin Erling Haaland-a thachhangdawltu a nih miau avangin kum 2023 UCL leh FA Cup final-ah bench-ah a ṭhu tluan a, 2024 FA Cup final-ah erawh bench aṭangin a lut.

Argentine forward hi City tan khel tam mah se hun pawimawha bench-a dah ṭhin a nih avangin an dah pawimawh tawk loah a ngai a, Etihad Stadium chhuahsan turin thutlukna a siam phah a ni.