Ka hun tawna ropui ber - Djokovic

Novak Djokovic chuan Paris Olympic gold medal a vuak chhuah chu a dahsang hle a, infiamna khawvela a hun tawn tawh zinga ropui ber a nih thu a sawi chhuak hial.

Serbian star Djokovic hian Spanish tlangval Carlos Alcaraz hnehin mipa singles gold medal a la. Grand Slam nomawi 24 tehmeuh chawi tawh mah se, an ram tana infiamna khawmpui liana hlawhtlinna chu a dang sang hle a ni.

Kum 37 mi Djokovic chuan, "Olympic ka khelh hmasak ber chu 2008 kha niin bronze medal ka la, a hnu lamah Olympic vawi thum khel lehin medal ka la phak lo vek, semifinal ka pel thei ngai lo.

"Kuminah kum 37 mi ni chungin ka khel a, gold medal ka chuhpui kha kum 21 mi niin tun dinhmunah chuan khawvela player ṭha ber a ni hial ang. French Open leh Wimbledon a zawna la thei a nihna khan a ti fiah.

"Hlawhtlinna hi kan tehna leh ngaihhlut dan a zirin a danglam thei a, ka tehna aṭang chuan infiamna khawvela ka tawn san leh ropui ber chu Olympic gold medal hi a ni," tiin a sawi.

Djokovic khan set hloh miah loin gold medal a vaw chhuak thei a, final bikah khan a khingpuiin a service a chhuhsak theihna tur remchang chu vawi riat ngawt a inchhanhim a, ama service chu a hum ṭha hle thung.

Chanchinbu mite a hmachhawnnaah Djokovic chuan, "Mahni duh leh tum ang ngawtin a awm theih lo. Paris hi a hnuhnung ber tura ngaihna pawh a lian, chutihrualin Los Angeles Games kan sawi bo erawh a rem chuang lo," tiin a hma hun a la sawi chiang duh rih lo.

Mipa tennis player ropui bik zingah Djokovic leh Rafael Nadal ten Grand Slam pali leh Olympic an la kim a, hetih lai hian Roger Federer erawh infiamna khawmpui lian berah hian a champion ta lo thung a ni.