Police leh Bethlehem dinhmun a hriat dawn
GIG Motors I Day Football-ah vawiin tlai dar 3:30 hian Mizoram Police-in NorthEast United Reserves an hmachhawn dawn a, chhun dar 12:00-ah Aizawl FC leh FC Bethlehem te an inkhel bawk ang. Vawiin inkhel result aṭangin Police, NE United leh Bethlehem hawi lam tur a hriat theih a rinawm.
Beisei nei Bethlehem
FC Bethlehemin match hmasa berah Mizoram Police hneh lo mah se Chawnpui an hneh avangin semifinal luh beiseina an la nei. Lalhriatpuia Sailo hote hian season hmang ṭha Aizawl FC an hmachhawn dawn a, point hmuh hrim hrim a har dawn.
FCB hian MPL11-ah chak hmel an la hmu lo a, I Day Football-ah erawh match hnihah vawi khat an chak. Coach Hriatpuia leh a thawhpui Lalthantluanga (T2-a) ten an ṭhat dan an hre ṭan a, chutihrualin an awmna group hi 'Group of Death' a ni tlat.
Aizawl FC erawhin hma an sawn zel a, winger Lalbiakdika a langsar ṭhin. Chutihrualin BD-a chauh hi Aizawl FC innghahna a ni lo a, kil tinah Victor Lalbiakmawia hote hi an ṭha. Hei vang hian Bethlehem tan fimkhur taka khelh a ṭul dawn a, I League club laka point khat hlawhchhuah hi result ṭha a ni ang.
En châkawm chu
MPL champion lai Mizoram Police leh NE United reserves inkhel tur hi en a châkawm. Chutihrualin Aizawl FC lakah NE United rawltharte an che thei lo a, Police lakah pawh beisei san ngam a har.
Police hian hahdamna hun an nei a, NE United hmachhawn an châk tawh ang. Lalbiaksanga Colney hote hian an match hmasa berah Bethlehem lakah comeback ropui an lantir a, Malsawmfela goal ropui chu a hmuna inkhel entute mitthlaah a cham reng ang. 1st Bn MAP Ground-a inkhel hi live telecast a nih loh avangin Sawmfela goal hi mi tlemte chauhin an hmu dawn tihna a ni a, a pawi takzet.
Player tawnhriat ṭha tamna Police hian tun hma aṭangin player naupang khelh an thiam ṭhin a, NE United rawltharte pawh hi a hunah chuan an dim lo ang. MPL11-ah Police-in rawlthar rual awmna SYS FC hneh lo mah se I Day Football-ah erawh defender ṭha FC Lalhmunmawia an kawl tawh a, counter attack pawh an dawl tawh tura ngaih a ni.