Final atan Chopra a tling

Olympic champion lai Neeraj Chopra chu Paris Olympic 2024 neih laia mipa fei khawh (javelin throw) final hmachhawn turin a tling - August 8, Ningani chawhnu dar 1:30 hian gold medal dawng tur an chingfel ang.

Nimina qualifying an neihah India tlangval hian a fei khawh hmasa berah 89.34m a thui a khawh a, hei hi final hmachhawn tura tlin nan a tawk. Qualifying lama 84m khawh pha chin chu an tling a ni.

Kum 26 mi Neeraj Chopra-a'n a khawh fuh ber ṭum chu Stockholm Diamond League kha niin, hemiah hian 89.94m a thui a khawh, tun ṭum hi a khawh thui ber dawt a ni. Tokyo Games-ah khan pakhatna ni turin 87.58m a lo khawh tawh.

Kenya mi Julius Yego leh Czech Republic tlangval Jakub Vadlejch te chuan 85.97m leh 85.63m a thui khawhin an tling bawk a, Germany mi Julian Weber (87.76m) leh Grenadian star Anderson Peters (88.63m) te pawhin final an hmachhawn dawn a ni.