Mihring ve tho kan ni - Ngamba

Paris Olympic neih laia ram buai vanga mahni rama awm thei lo, hmun hrang hranga raltlan khawmte chu 'Refugee Olympic Team' tia vuahin an inlan a, an zinga boxer pakhat Cindy Ngamba-i chuan ram dang mite anga bawka mi pangngai an nih ve thu a sawi.

Cindy Ngamba hian boxing women's 75kg semifinal a lut tawh a, zanin hian Panama aiawhtu Atheyna Bylon-i nen an inhmachhawn ang, chak lo pawh ni se a chhe berah bronze medal chu a dawng phak dawn tih a chiang tawh.

Refugee Olympic Team aṭanga medal hlawh chhuak hmasa bera chhal theih tawh Ngamba chuan, "Raltlan team aṭanga Olympic medal la thei hmasa ber nih chu sawi ngaihna awm lo khawpa lawmawm a ni, kei hi khawvel hmun hrang hranga raltlante aiawh a inlan ka ni.

"Hmabak erawh ka la nei, hlen chhuah ngei pawh ka tum dawn a, ka paltlang dawn tih pawh ka sawi ngam," tiin a inringtawk hle. Hmeichhe infiammi zingah Refugee Olympic Team zinga tel hmasa a ni bawk a, boruak pawh a ngam hle.

Refugee Olympic Team hi Rio-ah khan an lo awm ṭan tawh, a hnuah Tokyo Games-ah khan tel lehin Hamoon Derafshipour (karate) leh Kimia Alizadeh (taekwondo) te chu pangana an lo ni tawh a, tun ṭum hi an thlen san ber a la ni.