A thlen chinah Simone Biles a lungawi

Simone Biles chuan a duhthusam ang thlapin Paris Olympic 2024 hmang lo mah se, harsatna paltlanga a lo kir leh danah a lawm tawk tih a sawi - a duhthusam ang vek a ni lo chung pawhin gold medal pathum chu a hlawh chhuak tho!

United States gymnast ropui Biles hian artistic all-round, individual all-round leh vault huangah pakhatna dinhmun a luah, inelna dang floor exercise huangah erawh hrem vanga point paihsak niin, silver medal-ah a lungawi a ngai ta zawk a ni.

Infiammi hlawhtling berte zinga mi Biles chuan, "Khawvel infiammi ṭha ber berte nen kan inel a, an chetla lai hmuh a nuam in min ti hlim hle. Mihring chuan thlen chak leh tum ram kan nei vek a, kan duh ang veka thil a thlen loh pawhin kan ngaihtuah a pawimawh," a ti.

Floor final-ah hian Rebeca Andrade chu pakhatna a ni a, Brazilian nula Andrade tan Olympic medal hmasa ber a ni a, lawmman dawnna dawhsan a din lain Biles leh amah ang bawka American mi Jordan Chiles te chuan Andrade hi zahna chibai an buk a, an thil tih hian fak a hlawh hle.

Biles chauh pawh hian USA tan a thawhhlawk ṭhin. Rio Olympic-ah khan gold medal pali a lo la tawh, rilru lama harsatna neih vangin Tokyo Games-ah a inlan mumal lo, a tawpah silver medal pakhat a la hram, tunah erawh gold medal pathum leh silver medal pakhat nen a lo kir leh ta a ni.

Nimin tlai thleng khan USA chuan gold medal 21 la tawhin Paris Olympic neih laiah hma an hruai mek a, medal an lak tawh zawng zawng hi 79 a tling, an dawtah hian kum danga an elpui ni ṭhin China awmin a thlengtu France chuan gold medal 13 an la ve tawh bawk.