Engtikah nge European football season a inṭan dawn?
Season a zo a, a reh tak tak hmain Euro 2024 leh Copa America en tur a awm zui a, mahse, ram leh ram inelna hi a zawh ve leh tak avangin football ngainatu tan chuan a reh dukin a hriat!
Football transfer ngaihnawm tak tak hriat tur awm mah se, beng titlai chauh a tling a, mit titlai an ni thei si lo - pre-season tour club langsarten an nei a, inelna tak tak ṭan a nih hma hauhin fan-te chu kan phu deuh suau ni berin a lang.
"Engtikah nge season an ṭan dawn?" tiin fans tam takin zawhna kan nei a, European football-a league langsarte ṭan hun chu a hnuaiah hian kan tarlang e - tun aṭangin lo inpuahchah la.
Serie A
August 17, Inrinni zan dar 10:00 aṭangin Serie A khelh ṭan a ni dawn a, champion lai Inter Milan chuan Genoa hmachhawnin season bul an ṭan nghal ang - tun season-ah hian Como, Parma leh Venezia te chuan kai thar ni chungin Italian top flight league an khel dawn.
Atalanta, Bologna, Inter Milan, Juventus leh AC Milan chu Serie A aṭanga Champions League khel tur an ni a, AS Roma (Europa League) leh Fiorentina (Europa Conference League) ten European football an khel bawk ang.
Transfer langsar: Douglas Luiz (Aston Villa - Juventus, £42.4mtd); Alvaro Morata (Atletico Madrid - AC Milan, £11mtd); Che Adams (Southampton - Torino, free); Mehdi Taremi (Porto - Inter Milan, free)
La Liga
August 15, Ningani zan dar 10:30-ah match hmasa ber khelh tur a ni dawn a, Athletic Bilbao-in Getafe an mikhual ang. Ṭum dang ang thoin Real Madrid, Barcelona leh Atletico Madrid chu Champions League khel tur an ni a, Girona hming a lang ve bawk.
Athletic Bilbao leh Real Sociedad ten Europa League khelin, Europa Conference League-ah Real Betis an inlan dawn a, Leganes, Real Valladolid leh Espanyol chu season thara La Liga khel tura inpetkai an ni.
Transfer langsar: Kylian Mbappe (Paris St-Germain - Real Madrid, free); Endrick (Palmeiras - Real Madrid, £38.8mtd); Alvaro Djalo (Braga - Athletic Bilbao, £12.9mtd)
Bundesliga
August 23, zan dar 12:00-ah Borussia Mönchengladbach chuan champion lai Bayer Leverkusen mikhualin, season bul an ṭan dawn a, Xabi Alonso hoa champion Leverkusen hian ngaihven an hlawh nghal ang - St Pauli leh Holstein Kiel te chu German top flight league-a hmel thar turte an ni.
Bayern-in an nomawi an hloh avangin ṭan an la nasa a, hei tak hian season thar a tinghahhlelhawm hle. European football-a an chet ṭhat zarzoin, Bundesliga hian Champions League-ah team panga an thawh dawn a, Leverkusen bakah VfB Stuttgart, Bayern, RB Leipzig leh Borussia Dortmund chu Champions League khel tur an ni a, Eintracht Frankfurt leh Hoffenheim chu Europa League-a inlan tur niin, Heidenheim chuan Europa Conference League an khel ang.
Transfer langsar: Michael Olise (Crystal Palace - Bayern Munich, £45mtd); Joao Palhinha (Fulham - Bayern Munich, £42.3mtd); Serhou Guirassy (Stuttgart - Dortmund, £14.7mtd); Aleix Garcia (Girona - Leverkusen, £15.16mtd)
Eredivisie
European top five league-te ang em chuan ngaihven hlawh lo mah se, Dutch league hian ngaihthah a hlawh ngai lo. August 9, Zirtawpni zan dar 11:30-ah Groningen chuan NAC Breda mikhualin season khuhhawnna an nei ang - PSV Eindhoven, Feyenoord leh FC Twente te chu Champions League khel tur an ni dawn.
Dutch club lar ber tia chhal ngam Ajax chuan AZ Alkmaar nen Europa League an khel ang a, Go Ahead Eagles-in ECL an khel thung ang. Willem II, Groningen leh NAC Breda te chu second division aṭanga inhlangkaite an ni.
Transfer langsar: Sergino Dest (Barcelona - PSV Eindhoven, free); Malik Tillman (Bayern Munich - PSV Eindhoven, £10.1mtd); Bertrand Traore (Villarreal - Ajax, free)
Ligue 1
Paris Saint-Germain chuan August 16, Zirtawpni zan dar 12:15-ah Le Havre an lenchilh ang a, season thar atana Ligue 1 match hmasa ber an khel ang - PSG bakah AS Monaco, Brest leh Lille te chu season thara Champions League khel tur an ni.
Nice leh Lyon ten Europa League champion nih an tum ngam dawn a, Lens-in Europa Conference League an khel ang - Auxerre, Angers leh Saint-Etienne te chu French top flight league kai thar an ni a, mak takin tun season nipui transfer-a French club langsar ber hi PSG ni loin, Lyon an ni tlat!
Transfer langsar: Joao Neves (Benfica- PSG, £50 + £10mtd), Moussa Niakhate (Nottingham Forest - Lyon, £27mtd), Mason Greenwood (Manchester United - Marseille, £26.7mtd), Georges Mikautadze (Metz - Lyon, £15.6mtd), Said Benrahma (West Ham - Lyon, £12.2mtd)
Primeira Liga
August 9, Zirtawpni zan dar 12:45-ah Sporting Lisbon chuan Rio Ave an mikhual dawn a, season thar atana Portuguese top flight league match hmasa ber a ni ang - Sporting hian Benfica nen Champions League an khel dawn.
FC Porto leh Braga chu Europa League lamah inlanin, Vitoria Guimaraes chuan ECL an khel dawn. Santa Clara, Nacional leh AVS te chu tun season aṭanga Primeira Liga inlan tur an ni.
Transfer langsar: Vangelis Pavlidis (AZ Alkmaar - Benfica, £15.2mtd); Francisco Conceicao (Ajax - Porto, £8.8mtd), Zeno Debast (Anderlecht - Sporting, £13.1mtd)
Premier League
Khawvel huap pawha league lar bera chhal ngam Premier League chu August 16 zan dar 12:30 hian khelh ṭan a ni dawn a, Manchester United chuan Fulham an mikhual ang. Leicester City leh Southampton ten season khat chauh Championship-a hun an hman hnuin Premier League-ah an lo kir a, Ipswich Town an awm ve leh ta bawk.
Champions League-ah Manchester City, Arsenal, Liverpool leh Aston Villa an inlan dawn a, Europa League-ah Manchester United leh Tottenham Hotspur an khel ang a, ECL-ah Chelsea chuan English top flight league ai an awh dawn.
Transfer langsar: Riccardo Calafiori (Bologna - Arsenal, £33.6mtd + £8.4mtd); Kiernan Dewsbury-Hall (Leicester City - Chelsea, £30mtd); Savinho (Troyes - Manchester City, £21mtd); Joshua Zirkzee (Bologna - Manchester United, £35mtd); Leny Yoro (Lille - Manchester United, £52.2mtd + £6.7mtd); Lewis Hall (Chelsea - Newcastle United, £28mtd); Amadou Onana (Everton - Aston Villa, £50mtd); Niclas Fullkrug (Borussia Dortmund - West Ham, £27mtd)