Hammers-ah Fullkrug a chiang ta

West Ham chuan Niclas Fullkrug chu Borussia Dortmund aṭangin an la lut fel ta a, Germany striker manah hian pound maktaduai 27 an seng - London club-ah hian kum li khel turin contract a ziak.

Kum 31 mi striker chuan, "West Ham ka zawm thei hi ka lawm a, ka ṭhian tharte nena khelmuala inlan hlan ka nghakhlel tawh hle. Ka ngaihdanah chuan Premier League hi khawvela league ṭha ber a ni a, ka tan chuan tun hi England-a kal a, club lian West Ham tana khelh hun tak a ni," a ti.

Germany tan vawi 21 inlana goal 13 khungtu Fullkrug hi Euro khelh zawh takah khan Germany tan inlanin, goal hnih a khung a, bul ṭan a nei lo thung. Season hmasa ṭan dawn khan Dortmund hi Werder Bremen aṭangin pound maktaduai 12.6-in a zawm a, inelna hrang hrangah match 46 khela goal 16 khungin, assist vawi 10 a nei.

Champions League final an luh theih nan player pawimawh a ni a, mahse, final-ah Real Madrid an hneh lo. Fullkrug chuan, "West Ham hian rei tak chu ka ngaihtuahna in lo luah tawh a, technical director Tim Steidten nen Werder Bremen-ah kan lo thawh dun tawh avangin kan inhre ṭha hle bawk.

"Hammers match ṭhenkhat ka en a, he team theihna hi ka hria a ni," a ti a, English club a zawm chhan a sawi. Hetihrual hian Fullkrug-a chhuah chhan langsar erawh Dortmund-in striker thar Serhou Guirassy an neih vang a ni. Season hmasa Bundesliga-a match 28-a goal 28 khungtu Guirassy hian VfB Stuttgart aṭangin €18mtd-in Dortmund hi a zawm.

Julen Lopetegui enkawlna hnuaiah Hammers-in inthuam ṭhat hna an thawk mek. Fullkrug hma hian Wolverhampton Wanderers captain Max Kilman (£40mtd), goalkeeper Wes Foderingham (free), Palmeiras aṭangin Brazilian winger Luis Guilherme (£25.5mtd), Leeds United forward Crysencio Summerville (£25mtd) te an la tawh a, Manchester United full back Aaron Wan-Bissaka leh Aston Villa forward Jhon Duran te an la hel bawk.