France leh Spain final-ah intawng dawn

Mipa Olympic football semifinal chu Thawhṭanni zan khan khelh a ni a, Spain chuan 2-1 a Morocco hnehin final an lut a, inelna thlengtu France-in 3-1 a Egypt hnehin final an lut ve bawk.

Orange Vélodrome-ah Morocco leh Spain ten semifinal khel hmasa zawkin, entu mipui 59,882 hmaah Morocco-in goal an khung hmasa zawk - Soufiane Rahimi chuan minute 37-naah penalty hmangin goal hmahruai a khung a, tun inelnaa goal ruk a khungna chiah a ni.

Mahse, second half-ah La Roja insiamremin, Euro 2024 champion squad-a tel phak Fermin Lopez chuan minute 65-naah si phurh sutna goal a khung a, Sevilla midfielder Juanlu Sánchez chuan minute 85-naah chakna goal a khung zui.

Semifinal hnuhnung zawkah France leh Egypt inhmachhawn ve lehin, France-in chak turin vanneihna an mamawh tel. Minute 62-naah Mahmoud Saber chuan Egypt tan goal hmahruai a khung a, goal luh hun nena thlirin, an goal khung hum theih mai an beisei.

Mahse, Jean-Philippe Mateta chuan ngaihdan dang neiin, Crystal Palace striker hian minute 83-naah si phurh sutna goal a khung a, goal dang a luh loh avangin extra time khelh zui a ni.

France vanneihna a kaltluang a, extra time khelh aṭanga minute hnihna lekah Omar Fayed chu hnawhchhuah a ni - fans puihna nen France dinhmun a ṭha sawt a, minute 99-naah Mateta chuan an goal hnihna a khung belh.

An la duhtawk lo cheu! Minute 108-naah Bayern Munich forward thar Michael Olise chuan chak nemnghehna goal a khung a, Egypt-in Olympic mipa football an beiseina chu a thamral a, kum 40 hnua a vawi khat nan France-in football-ah Olympic medal an la dawn tih a chiang.