St. Petersburg-ah Wawrinka a chak

Stan Wawrinka chuan St. Petersburg Open khelh laiah fiahna hautak a hmachhawn nghal, a match hmasa berah match point vawi thum ngawt inchhanhimin Dan Evans a hneh hram.

Grand Slam vawi thum champion tawh hian 3-6, 7-6 (3), 7-5 in hnehna a chang hram. 2016 US Open-ah khan player pahnih hi an lo intawng tawh, match point a inchhanhim hnuah Stan-a'n hnehna changin nomawi a chawi zui hial.

Swiss tar hian a match lehpekah chuan Evgeny Donskoy a hmachhawn ang. Russian tlangval wildcard hmanga inlan hian a khingpui Egor Gerasimov chu 6-4, 7-6 (4) in a lo hneh ve bawk a ni.

Inkhel dangah seeded pakhatna Daniil Med-vedev pawhin fiahna a hmachhawn, season hmasa US Open finalist hian Richard Gasquet chu 3-6, 6-3, 6-0 in a hneh. Inkhel tir lamah beisei phak lo mah se a insiamṭhat hnuah erawh a kal fawr hle.