Istanbul-ah Liver'PUL' an tlawm

Ningani zan khan Liverpool chu Europa League aṭangin hnawh­chhuah an ni a, 2005 Champions League final-a penalty hmanga AC Milan an lo hneh tawhna stadium-ah penalty hmang vekin pet chhuah an ni.

Ataturk Olympic Stadium-a inkhelah Besiktas 1-0 in an chak a, Anfield-ah Liverpool 1-0 a an chak avangin extra time khelh a ṭul. Extra time-ah goal a lut lo a, penalty shootout-ah Besiktas lamin an pet goal vek laiin Liverpool tan defender Dejan Lovren chuan a pet goal lo a, mualneitu Turkish club Besiktas 5-4 in penalty-ah an chak.

Inkhel chu

Liverpool tan last 16 thleng turin goal venhim a tawk a, draw a tawk tihna a ni.

Liverpool tan player pawimawh captain Steven Gerrard, Jordan Henderson, Mamadou Sakho leh Philippe Cou­tinho te inhliam vangin an inlan thei lo vek a, November 8 hnuah Mario Balotelli chuan Liverpool tan bul a rawn ṭan thung. Italian forward hi first leg-a penalty hmanga chakna goal khungtu a ni.

Inkhel an ṭan a, Be­siktas-in goal thun ngei tumin Liverpool an nawr a, chance nei hmasa zawk erawh Liverpool an ni. Raheem Sterling-a'n yard 20-a hla aṭangin a pet a, Besiktas keeper Cenk Gonen chuan ṭha takin a lo dan sak.

English club tan Daniel Sturridge leh Alberto Moreno te'n chance ṭha tak neih chhunzawm mah se, Besiktas keeper Gonen-a chesual duh lo a, first half-ah Liverpool-in khel ṭha zawk nichungin goal an khung lo.

Second-half an khel a, Besiktas player ten chawlhlawk chhungin fuihna an dawng ṭha tih a lang a, an khel ṭha sawt. Minute 72-naah Besiktas-in an khelh ṭhat rah an chhawr ta nge nge a, Gokhan Tore leh Demba Ba te thawhrah sengin bench aṭanga lut Tolgay Arslan chuan Besiktas tan goal pawimawh a khung, inkhel hmasa nena belhkhawmin 1-1 a ni chiah.

Besiktas lamin forward Ba hmangin chance nei mah se Chel­sea striker hlui hian goal-ah a chantir thei lo a, extra time khelh a ni.

Extra time-ah thil danglam thleng a awm lo a, penalty pet a ni. Besiktas tan-a pet ten an pet goal vek laiin Liverpool in season ṭan dawna Southampton aṭanga pound maktaduai 20-a an lei Lovren-a'n a pet over a, Besiktas 5-4 in an chak.

Inkhel behbawm

Liverpool hian tun hmain Europe-a penalty hmanga chak zawk zawn­naah chak loh an la nei ngai lo a, tun hi an chak loh vawi khatna a ni. 1984 European Cup final-ah AS Roma chu penalty-in an hneh tawh a, 2005 Champions League final-ah AC Milan chu penalty hmang bawka hneh lehin 2007 Champions League semi final-ah Chelsea an lo hneh tawh bawk.

Liverpool-in Sou­thampton aṭanga an lakluh Rickie Lambert hian penalty pet a thiam khawp mai, kum 2009-a Southampton a zawm hnuin penalty vawi 35 pet tawhin heng a penalty pet te hi a pet goal vek. Besiktas an hneh loh ṭum pawh hian a pet goal.

Eng nge an sawi?

Liverpool manager Brendan Rodgers chuan, "Ka player-te'n an khel ṭha takzet a, vanduaithlak takin zanin chu kan tan Istanbul khawpui in lawmna min thlen thei lo a ni," tiin Champions League a an lo champion tawhna khawpui Istanbul a sawi lang.

Rodgers chuan, "Goal an rawn khung hma kha chuan nuam ti takin kan khel a, kan tum ber chu goal chhuah loh kha a ni. Mahse, a hnuah kan talbuai a, chhuanlam tur a awm lo. Penalty a pet goal loh avangin Dejan Lovren ka tawrhpui a, penalty hmanga chak zawk zawn a nih tawh chuan tu emaw tak chuan a pet goal loh a ngai ṭhin. Dejan Lovren leh keini hi a tuartu chu kan a ni," a ti.

Besiktas coach Slaven Bilic chuan, "Kan tan chuan zan ropui tak a ni a, Besiktas leh Turkish football tan zanin hi zan lawmawm a ni. Chak zawk nih kha kan phu a, kan player-te ka chhuang takzet a ni," tiin a a lawm takzet.