ICC World Cup Thlirlawkna India Vs United Arab Emirates

Vawiin chhun dar 12:00 hian ICC Cricket World Cup-ah India an inkhel dawn a, an tum tur chu cricket khawvela hming langsar lo UAE an ni.

Team inang lo

India leh UAE te hi team in ang lo tak an ni. India hi World Cup ṭan dawna beisei kai lo, World Cup-a che ṭha em em an ni. An match khelh hmasak pahnihah an hmelma kumhlun Pakistan leh champion tura rinkai South Africa sawp thei an ni a, an ṭha tih a chiang.

UAE hi cricket-ah hming langsar an ni ngai lo a, tun World Cup hi World Cup-a an vawi hnih inlanna chauh a ni.

World Cup an khelh hmasak zawk ṭum chu kum 1996 daih tawh kha a ni. Kumin World Cup-a an match hmasa berah wicket liin Zimbabwe an hneh lo a, an match hnihnaah West Indies hnehtu Ireland chu wicket hnihin an hneh lo leh bawk.

Tu nge thlir tur?

India batsman-te hi kumin World Cup-a India chet ṭhat chhan an ni a, UAE bowler-te hmaah India batsman-te an hmuhnawm leh ngeiin a rinawm. Pakistan laka century siamtu Virat Kohli leh South Africa laka century siamtu Shikhar Dhawan te hi UAE tan chu mut ti tui lo tham an ni ang.

India bowler tan UAE batsman Shaiman Anwar hi ven fimkhur ngai tur chu a ni. Pakistan chhulchhuak Anwar hian an World Cup match hmasa bera Zimbabwe an khelh ṭumin run 67 a vawchhuak a, Ireland an khelh ṭumin century a siam leh bawk.

An inkhelhna tur hmun WACA (Western Australia Cricket Association) Ground hi fast bowler te chet ṭhatna hmun nia sawi a ni a, a pitch awm dan hi fast bowler-te tana ball vawm nawmna hmun a ni. Hetiang a nih vang hian India tan fast bowler Mohit Sharma leh Umesh Yadav te chet ṭhat a pawimawh ang.

Coach tel loin

India tan fast-bowler Mohammed Shami chu a khupah hliam a tawrh vangin a khelh theih a rinawm loh a, India coach Duncan Fletcher chu a puzawn thih vangin a naute a ho thei dawn lo bawk.