Khatla-in Mission Veng an nuai
Samsung 3:16 Plan Solution Mizoram Super League-ah champion tur a rinkai Khatla TBL-in an chungnung tih an lan tir a, Ningani zan khan Mission Veng Vikings 73-46 in an sawp.
Hawla Indoor Stadium-a mipui pungkhawm ṭhahnem tak hmaah Mission Veng Vikings-in inkhelh ṭan aṭanga minute nga chhung inkhel a thunun a, a hnu lamah erawh Khatla TBL rorelna a ni.
Vikings tan Lalrina Renthlei leh Moses Zoremmawia te a tir lamah an che ṭha a, TBL nen point 10 laiin an inthlau hman.
Amaherawhchu Khatla point guard Lalrinzuala'n inkhel a thlak danglam a, mamawh hunah point a score bakah a ṭhiante khung turin a siam sak bawk. Rina phir pui Vikings guard Lalnunpuia erawh a che thei lo a, TBL defence ṭhat vangin Lalrempuia Vaiphei-in point khat mah a nei lo a, hei hi Vikings leh TBL inthlauhna chhan a ni.
TBL tan Rina bakah Gospel Lalthuammawia a che ṭha a, Gos-a hian point 10 a nei a, chu aia ropui chu rebound 16 zet a nei. Vanlalmuana'n khelhna hun nei tam lo chungin point 21 zet a khung a, veteran player R. Darliansanga a la ṭangkai reng a, Nelson Lalrohlua'n a teammate-te a thlawp ṭha bawk.
TBL coach/player Laldinsanga chuan, "Bul kan ṭan ṭha lo a, a tira lutte'n tlar hnungah tih dik lo an nei a. An tihsual in hria se kan duh avangin time out pawh kan la duh lo a, an hriat hnuah erawh kan zir angin kan khel chhuakin ka hria. Vikings khelh fuh loh ni kan tawng kha kan vanneihna a ni," tiin an khelh dana a lungawi thu a sawi.
Team chungchang sawi chhunzawmin Mapuia chuan, "Kan team-ah chuan mimal lansarh hi kan tum a ni lo. Kan champion theihna tura theihtawp chhuah hi kan tih tur a ni. Bench-a ka ṭhut pawhin team tan ka thawk a, kan luh pawhin team tan bawk a ni," a ti.
MSL-a player langsar Mapuia hian Tuikual South an hneh ṭumin point 18 a score a, Vikings an hneh ṭumah erawh a luh tam loh avangin point thum chauh a score thung.
Vikings manager Vanlalawmpuia chuan, "Pressure sang kan zo lo a ni. A bak han sawi vak tur pawh a awm lo," tiin an theihna ang a an khelh chhuah loh thu a sawi.