Bulgarian club lian Sofia-ah Renedy

Indian footballer langsar zinga tel pha Renedy Singh chuan Ningani khan loan-in CSKA Sofia a zawm a, Bulgaria club-ah hian season tawp thleng a cham ang.

Manipur midfielder ball pet thiam Renedy hi ISL club Kerala Blasters player a ni a, kum 35-a nih tawh avangin a club tharah hian khelhna hmun a chan tam a rinawm loh. Amaherawhchu, Renedy hian inkhelh a chawlhsan huna coaching career ṭan a tum avangin Sofia coach Stoycho Mladenov hnen aṭangin hriatna ṭhahnem tak a neih belh ang.

Renedy Singh chuan, "Sofia ka zawm thei hi ka lawm takzet a ni. Bulgarian club hian history ropui tak a nei a, an zinga ka tel thei tur hi ka lawm hle a ni. Coach Stoycho Mladenov hian player a nih hunlai aṭangin tawhin tawnhriat a nei ṭha a, anni hnen aṭanga inzir hi kan châk tawh takzet a ni," a ti.

Manipur midfielder hi India player zinga Bulgaria club-a inziak lut hmasa ber a ni a, a club khelhna tur Sofia hi Bulgarian legend Hristo Stoichkov, Premier League a khel pha Stiliyan Petrov leh Martin Petrov te chher chhuaktu a ni.

India player hlui Renedy chuan, "Europe-a ka khelh theihna atana min puitu Rui Gomes, Nuno Mousinho Esteves leh Arunava Chaudhuri te chungah ka lawm takzet a ni," a ti.

Renedy Singh hi S. Malsawmtluanga te ang tho a, TATA football academy chhuak a ni a. Kum 1999 aṭanga 2011 chhung khan India tan a khel a, vawi 72 a inlan hman. Renedy hian a vang laiin India club lian Mohun Bagan, JCT leh East Bengal tan player pawimawh a nia , hun hnuhnung lamah Shillong Lajong tan a khel a, ISL ṭan khan Kerala Blasters a zawm a, vawi hnih chiah a inlan. Manipur midfielder hian kum 2014 khan Baichung Bhutia thlakin Football Players Association of India (FPAI) president atana thlan a ni.