MCL Thlirlawkna Chanmarians & Ramhlun Venglai
Mizorama Cricket inelna ngaihhlut Mapuia Cricket League (MCL) 2015, vawi thumna chu March 3 aṭangin Suaka Cricket Ground, Sihhmuiah khelh a ni dawn.
MCL khel tur team paruk zingah Armed Veng Cricket Club leh Chaltlang Sporting Club te kan thlir lawk tawh a, tun ṭumah hian Chanmarians Cricket Club leh Ramhlun Venglai Cricket Club te thlir lawkna kan nei ang a. Issue dangah Zarkawt Lords Cricket Club leh Zemabawk Pitchers Cricket Club te bihchiang leh bawk ang.
Chanmarians Cricket Club
Tun season-a club hlawhtling ber tih ngam chu Chanmarians CC hi an ni. Tun season-ah inelna pathum an hmachhawn tawh a, heng tournament-ah hian an result chhe ber pawh CHAMPION a ni.
Chanmarians CC tih hming pua cricket inelnaa an tel hnuah tun season hi an la hlawhtlin ber ṭum a ni a, cricket tui tamna veng hian tun hmain ropuina hrang hrang lo hui tawh mah se Chanmarians CC tih hming hian an la hlawhtling tam lo. Tun season-ah a vawi khatna atan 1st division inelnaah an champion a, MCL-ah pawh a vawi khatna atan champion an tum ruh hle.
He team chakna hnar ber pakhat chu an batting lineup a ni. He team hian Mizorama batsman ṭha tam zawk chu an kawl a, hetihlai hian an bowler tawnhriat ngah tawh tak takte'n an chhan chhuak ve zauh zauh bawk. An squad ti chak turin an veng tlangval club danga khel chhuak Lalfakzuala an lalut hian kawng tam takah inrintawk a pek belh ngei ang. MCL player auction-ah Rs. 14600 an seng a, an player neih sate nen champion pui tham squad dinah an inngai.
Auction-a an player leite
Lalfakzuala (Bawngkawn South CC) Rs. 9800; Rajiv Jaishi (Gorkha CC) Rs. 3000; Abraham Lalmuanpuia (Downshire CC) Rs. 1800
Ramhlun Venglai Cricket Club
Veng lian taka sawi tur ni si loa Mizoram cricket inelna khawvela palian tak, Ramhlun Venglai hi season hmasaa an tlakhniam hret avangin tun season-ah 2nd division an khel a, mahse 2nd division inelnaah hian finalist niin season tharah chuan 1st division team an ni leh nghal dawn.
Season hmasa khan MCL khel tur hian auction paltlangin an tling a, an contract-ah season hnih chhung khel thei an nih avangin tun season-ah an hmel kan hmu leh dawn.
He team hi 2nd division club an nih anga en chi an ni lo ang. Player tawnhriat ngah tak tak an kawl bakah a khawtlang anga cricket-a an tuina hi an chakna hnar pakhat a ni. Player auction lamah hlawhtling thawkhatah an inngai a, 2nd division inelnaa Chhinga Veng CC champion-na kawnga an player pawimawh tak Rosiamliana Ralte Junior (Player of the Tournament) an chang thei hian nasa takin an team a chawi kang tura ngaih a ni.
Mizorama ṭha taka academy enkawl thei team an nih avangin naupang duhawm tak tak an rawn thawh chhuah pui leh tura ngaih a ni a, anmahni ho turin India age level thlenga tawnhriat lo nei tawhte an awm bawka MCL-ah hian 2nd division team ena en ngawt chi an ni bik lo ang.
Player auction-ah Rs. 10500 chiah an seng a, hetichung hian an mamawh tak la theiah an inngai.
Auction-a an player leite
Rosiamliana Ralte Junior (Chhinga Veng Cricket Club) Rs. 9500; James Lalṭhazuala (Laipuitlang Cricket Club) Rs. 1000