City-in Anfield-ah Liverpool an luh khung dawn
Pathianni tlai dar 5:30-ah Premier League match hmuhnawm hmuh tur a awm dawn a, Liverpool-in Anfield-ah champion lai Manchester City an lo mikhual dawn.
Nikum tun ang huna champion inchuh team hi season ṭan tira Liverpool chet chhiat vangin nikum nena khaikhin chuan an dinhmun a inang tawh lo hle. Manchester City-in champion tumin an khel ang a, Liverpool-in Champions League khelh ngei tumin an khel thung ang.
Chak zo lo pahnih
Liverpool leh Manchester City hi tunkar chho khan Europe match an neiha chak zo lo ve ve an ni a, chak loh zawn an tum lo ang.
Manchester City hian Liverpool striker hlui Luis Suarez an ngam loh vangin an khelmualah Barcelona 1-2 in an hneh lo a, Nou Camp-a la leng lut leh tur an nih avangin dinhmun duhawm lo takah an ding mek. An chak loh theihnghilhin English champion an tumna kawngah Liverpool hneh ngei tumin an player ṭha ber ber an thawhchhuah pui ang.
Liverpool hi Europa League last 32 aṭanga tla hlim an ni a, penalty-ah Turkish club Besiktas an hneh lo. Liverpool hian FA Cup bak khelh tur dang an neih tawh loh avangin Manchester City an tum hunah Champions League khelh ngei an tum bawk avangin players ṭha an in ren vak lo ang.
Besiktas an khelh ṭuma inhliam vanga inlan thei lo captain Steven Gerrard, Phillipe Coutinho leh Jordan Henderson te an khel theih tawh beisei a ni.
Chanchin hlui
English club ropui Liverpool hian Arab sumin Manchester City a lei hnuin City an ngam lo hle. Premier League-a City nena an game hnuhnung 12-ah Liverpool-in vawi hnih chiah hnehna an chang a, vawi ruk an inhnehtawk a, vawi li an chak lo.
City hian Liverpool hi tunhnaiah an ngam hrim hrim a, Premier League-a an intum hnuhnung match rukah goal hnih aia tlem Liverpool lamah an la khung lo. Mahse, Anfield-ah erawh Manchester City hi inchhuang thei an awm lo.
Anfield-a an match hnuhnung 11-ah chak result vawikhatmah an la hlawhchhuak zo lo a, vawi sarih lai chak loin vawi li an draw a ni.
Reds an vul zo em?
Liverpool hian nikumah point hnih chiahin champion lai Manchester City an hneh lo a, an vanduai. Beiseina sang tak nen tun season an thlir a, an beisei angin season an ṭan ṭha lo. Kum 2015 a lo herchhuak a, Liverpool in an zia tak tak an pholang ṭan. Premier League match hnuhnung vawi sawm an khelhah vawi sarih chakin vawi thum an draw a, chak loh vawikhatmah an nei lo.
Premier League bika an hneh loh hnuhnung ber chu December 14-a Manchester United an hneh loh kha a ni daih tawh.
Manchester City erawh tunhnaiah an talbuai a, Premier League match hnuhnung vawi ruk an khelhah vawi hnih chiah chak result an hlawhchhuak thei a, vawi thum draw in vawikhat an chak lo. Premier league-a an hneh loh hnuhnung ber chu Arsenal an ni a, an khelmualah 2-0 in an tlawm.
Tunhnaia an khelh dante enin Liverpool-in game hmuhnawm min chhawpchhuahsak leh ngeiin a rinawm a, an rawlthar duhawm rual Raheem Sterling, Coutinho leh Daniel Sturridge te'n Barcelona an tum ṭuma talbuai Manchester City defence an chhaih buai hneh viauin a rinawm.
Manchester City lamin Sergio Aguero leh Edin Dzeko te an neih ve tho avangin an zam bik lo ang. An Premier League match hnuhnung bera Newcastle United lama goal nga khung thei City tlar hma hi Southampton an khelh ṭuma khel ṭha em em Liverpool tlar hnungin dang an tum dawn a ni.