Emirates Stadium-ah Everton an leng dawn

Everton-in Europa League-ah BSC Young Boys 7-2 a sawpin last 16 an lut a, zanin dar 7:30 a an hmachhawn tur Arsenal hi Champions League last 16 first leg-ah Monaco 3-1 in an hneh lo. Gunners hian French club laka an mualphona hmun Emirates-ah Everton an mikhual dawn.

Table-a pathumna dinhmun luahtu Arsenal hian point 48 an hmu tawh a, an khingpui tur Everton hian point 28 hlawhchhuak tawh in table-ah 12-na an ni mek. An inthlauh na hi point 20 lai a ni.

Arsenal manager Arsene Wenger chuan, "Kum khatah match 55 vel kan khel a, result chhiat ṭum chu a awm ve tur a ni. A pawimawh ber chu season ṭha taka hman zawh a ni. Monaco kan hneh loh avanga kan lungawi lohna hi Everton kan hmachhawn hun kan lantir tur a ni. Premier League hi inelna dang a ni a, pathumna dihmunah hian kan awm chhunzawm zel a ṭul a ni," tiin a sawi.

Wenger chuan sawi chhunzawmin, "Monaco kan hneh loh avangin sawiselna tam tak kan dawng a, sawisel aia tawrh hreawm zawk chu kan chak lo kha a ni. Chak kan duh a, chak loh hi ngaiah a neih theh loh" tiin a sawi.

Arsenal midfielder Jack Wilshere chu bei­sei angin a dam chak lo a, Mikel Arteta leh French defender Mathieu Debuchy te nen an inhkhel thei lawk dawn lo. Chutihrualin midfielder Aaron Ramsey leh Mathieu Flamini te'n 100% fitness an hnaih leh tawh a, Everton nen erawh an chhawr hman kher lo ang.