Spurs zinkawng a tawp

Ningani zan khan Tottenham Hotspurs-in an khelmual White Hart Lane-a 1-1 a an draw Fiorentina chu Italy-ah 2-0 in an hneh lo a, Europa League-a an zin kawng a tawp.

Fiorentina tan German striker Mario Gomez leh Egyptian winger Mohamed Salah te'n second half-ah goal khat ve ve an khung a, inkhel pahnih belh khawmah 3-1 in an chak.

Stadio Artemio Franchi-a inkhelah hian goal khung mamawh Tottenham-in goal an khung thei lo a, Erik Lamela leh Christian Eriksen te'n first half-ah an hun ṭha hmuh an chhawr ṭangkai lo.

Second half ṭan hnu lawkah Gomez-a'n Croatian midfielder Milan Badelj hnen aṭanga a ball hmuh chu goal-ah a chan tir a; minute 70-naah Salah chuan goal khung belh lehin an hma hruaina a sawh nghet. Spurs-in Italy-ah goal an khung lo a, Fiorentina an chak.

February thla tira Chelsea aṭanga loan-a Fiorentina zawmtu Salah hian a club thar tan goal thum a khung tawh a, a team-te hi inelna hrang hrangah hneh loh nei lovin game 11 chhung an kaltluang mek a ni.

Spurs boss Mauricio Pochettino chuan, "Football-ah chuan chak turin goal khung a ngai a, mah se zanin khan kan khung thei tlat si lo. Inkhel inhnehtawk tak a ni a, kan danglamna chu goal an khung bik kha a ni," tiin a sawi.

Goal thuntu Gomez chuan, "Kan khel ṭhat avangin round sang zawk kan inhlangkai ta, fan-te'n min ṭawiawm ṭhat avangin kan lawm hle a ni. Final sawi nan chuan ala hma deuh mah se final thleng ngei turin kan team hi kan ṭha tawk a, kan thlen theih ngei pawh ka ring," tiin a sawi.