League Cup Final-ah London Derby Chelsea Vs Tottenham Hotspurs
Pathianni zan dar 9:30 hian Wembley Stadium-ah West London club Chelsea leh North London club Tottenham Hotspur te'n English League Cup final an khel dawn a, Ten Action-ah live a pekchhuah a ni ang.
London Derby Premier League hmahruaitu Chelsea leh Totenham inkhel tur hian ngaihven a hlawh a, London club inhal leh inel tak an ni. Chu mai bakah Chelsea hi champion loh hrethiam lo Jose Mourinho-a'n a enkawl vang leh Spurs hi Europa League aṭang a tla hlim an nia, fans leh club thuneitu te rilru na thawi dam nan Mauricio Pochettino leh a naute hian champion an tum ruh hle ang.
Final hmasa
Team pahnih hi final-ah ṭum hnih an lo inhmachhawn tawh a, 1967 FA Cup final-a an inhmachhawn ṭumin Tottenham hi 2-1 in an chak a, kum 2008 Carling Cup final-ah a ṭum hnihna atan an intawng a, Tottenham hian 2-1 thoin Chelsea hi an hneh.
Club ṭha pahnih inkhelah chuan 2-1 hi result awm thei tak a ni a, ṭum thumnaah pawh hian 2-1 result awm tak a ni. Chak tur erawh a chiang lo.
Tunlai boruak
Tottenham hian semifinal-ah Sheffield United an hneh a, Chelsea hian final thleng turin Liverpool an paltlang thung.
Chelsea hian Premier League-ah point 60 hmuin hmahruaitu an ni a, an khingpui tur Tottenham hian point 44 hmuin table-ah pasarihna an ni mek bawk.
Tottenham hi Europa League aṭang a tla hlim an ni a, Fiorentina hneh loin Europa League aṭangin an tla. Chelsea hi kar hmasa khan Champions League last 16 first leg-ah an khingpui PSG lakah an chak zo bik lo.
Tute nge inlan dawn
Kum 26-a upa Diego Costa hi Chelsea tan innghahna tham a ni. Atletico Madrid aṭanga Chelsea zawmtu hian a club thar tan hian Premier League-ah goal 17 khung tawhin top scorer a ni mek.
English striker ṭhang duang Harry Kane hi Spurs tan thlamuan pui awm khawpin tunlai hian a khel ṭha tluang mek. Tun season-ah spurs tan game 38 khel tawhin goal 24 a khung tawh. Chelsea keeper Thibaut Courtois chuan Kane-a chelh dan a hriat thu a sawi a, Pathianni zanah a chiang ang.
Chelsea tan Belgian winger Eden Hazard leh Spanish midfielder Cesc Fabregas-a te an pawimawh leh ang, amaherawhchu Nemanja Matic khel thei lo tur hian Chelsea hmel hmang a ti danglam thei thung.
Spurs midfielder Christian Eriksen-a'n tun season-ah Spurs tan goal 11 a khung tawh a, a theihna thlirin Europe-a player langsar a ni hi a mak lo. Emmanuel Adebayor pawh hi final boruak sangah a pawimawh ang.
Eng nge an sawi?
Spurs boss Mauricio Pochettino chuan, "Tunah chuan chak loh leh rilru na sawi a hun lo, final-a kan chak ngei theih na turin kan rilru zawng zawng kan seng tur a ni. Team ṭha tak kan hmachhawn dawn a, keini pawh hi team ṭha tak ve tho kan ni. Nomawi chawi ngei turin kan bei dawn a ni," tiin a sawi.
Chelsea boss Jose Mourinho chuan, "Tottenham hian player ṭha tak tak an nei a, position tinah hian player ṭha an nei vek a, khelhpui an awlsam lo ang. England-ah Liverpool, Arsenal leh Manchester United-te final-ah ka lo hmachhawn tawh a, Spurs hi English club lian dangte nen an danglamna a awm lo," tiin chak lo thei an nih thu a sawi.