South Africa-in West Indies an sawp

Nimin khan 2015 ICC Cricket World Cup-ah South Africa-in an theihna an lantir a, run 257-in West Indies an sawp.

Sydney Cricket Ground-a inkhelah hian South Africa tan captain AB de Villiers a hun takah a che chhuak a, run 162 vawchhuakin a team hi a chakpui a ni.

Record thar

South Africa hian an match hmasa berah Zimbabwe an hneh loh hnuin run 130 laiin India an hneh lo a, an mualpho.

West Indies hi match hmasa bera Ireland an hneh loh hnuin Pakistan leh Zimbabwe an sawp a, chak tur zawk sawi thiam a harsa.

Inkhel an ṭan a, bat hmasa zawkah South Africa an ṭang. South Africa tan captain AB de Villiers a che ṭha a, ball 66 a hmachhawnah run 162 vawchhuakin a tawp thleng a dam. De Villiers hian ODI record a siam nghal a, ball 64 a hma­chhawnin run 150 a vawchhuak tawh a, hei hi ODI record-a run 150 vuakchhuah nana ball mamawh tlem ber record a ni.

Villiers hi batsman dang te'na n thlawp ṭha bawk a, over 50-ah South Africa in run 408 an vawchhuakin wicket panga chiah an hloh. World Cup match khata team pakhatin run an siam hnem ber dawttu a ni.

West Indies bat hun a thleng a, an batsman te'n South African bowler te an ngam lo. South Africa bowler zingah Imran Tahir a che ṭha fal a, run 45 chiah pein wicket nga a la thei. Zimbabwe an tum ṭuma khel ṭha em em Chris Gayle leh Marlon Samuels te'n an theihna an pho lang zo lo a, Gayle hi run thum a siam hman tihin a out a, Samuels phei chu run siam loin a out nghe nghe.

West Indies hian over 33.1 thleng chiah daihin run 151 an vawchhuak a, an out vek.

He inkhela che ṭha em em mai De Villiers chuan, "Rilee Rossouw-a'n ball 39 a run 61 a vuakchhuah khan keimahah phurna nasa tak min pe ni berin ka hria. Kha vang khan ṭha takin ka khelh chhuah theih phah a ni. A pawimawh ber chu kan game hriatchian a, kan chaklohna leh kan chakna lai kan hriat hi a ni. Nuam ti takin ka khel a, bowlers te tana hna hautak siam sak tur khan ka theihtawp ka chhuah a ni," a ti.