Olympic aṭangin Vinesh an paih!

India tana Paris Olympic medal la thei dinhmuna ding, pakhatna emaw pahnihna emaw zawk ni mai thei tawh tur Vinesh Phogat chu a rih tur ang zat aia a lo rih hret avangin inelna aṭanga paih chhuah a ni.

Women’s 50kg wrestling huangah Vinesh-i hi United States mi Sarah Hildebrandt nen gold medal inchuh tur an ni, mahse nimina an inbukah 100 grams chuang hretin a lo rit a, a tan medal lak theih a ni dawn lo.

Paris Olympic 2024 a hmachhawn tir lamah chuan Vinesh hi 49.9 kg a ni a, infiamna khawmpui lianah hian a zawnin match thum a chak chho, a hneh zingah hian Olympic champion Yui Susaki pawh a tel hial.

Match pakhata Cuban nula Yuznelys Guzman nen an inchai zawh chuan 52.7kg lai a lo ni ta mai! Amah bakah a coach leh staff zawng zawngten theihtawp an chhuah a, inbuk leh hma hian tlaivarin engmah an ei lo, tuisik takngial pawh a in lo hial a ni.

Mahse, France rama zing lam dar 7:00 bawrah inbuk hun a lo thleng a, a rih tur bituk aiin a rit ta hret. United World Wrestling (UWW) dan leh hrai ang chuan, infiammi a rih tur bituk aia a rih chuan inelna a hmachhawn theih loh bakah medal a la thei lo.

Vinseh hi tun hma chuan 48 kg category-ah a khel ṭhin, hetih lai hian kum 22 mi chauh a la ni. A rihna a san belh a, hei vang hian 53 kg category-ah a insawn, mahse tah hian midang rihna nena khaikhinin harsatna a nei a, 50kg category-ah a tihniam leh phawt.

Kum 29 mi a ni tawh a, a rihna hi ngelnghet viau tawh tura ngaih a ni. Mahse, kumin April thla mai pawh khan Asian Olympic Qualifier khelh laiin a rihna hi a tihhniam luih hram a lo ngai tawh, tunah harsatna paltlang theih loh a tawk ta a ni.

Nimin tlai khan India chhuanvawr pakhat Antim Panghal chu 53kg wrestling freestyle-ah a inlan a, besei nei sang viau mah se a match hmasa berah Tutkey mi Zeynep Yetgil lakah technical superiority (10-0) in a chak lo nghal.

Kum 19 mi Panghal tan Olympic a hmachhawn hmasak ber a ni a, tun hmain world junior champion pawh a lo ni tawh. Mahse, tun ṭumah chuan a che fuh lo, minute khat leh second 41 lekah a khingpui hian a hneh fel der a ni.

India medal beiseina ber a thamral leh takah chuan, nimin tlai thleng khan India hian bronze medal pathum a lak sa bak chu a la chhunzawm leh rih lo.